មន្ត្រីជាន់ខ្ពស់ក្រុមហាម៉ាស បានសារភាពថា ក្រុមភេរវករ មិនដឹងថា ចំណាប់ថ្នូរ ១២០នាក់ ដែលនៅសេសសល់របស់អ៊ីស្រាអែល នៅតំបន់ហ្កាហ្សា នៅរស់ ឬស្លាប់នោះទេ។

លោក Osama Hamdan អ្នកនាំពាក្យក្រុមហាម៉ាស និងជាសមាជិកការិយាល័យនយោបាយ បានប្រាប់សារព័ត៌មាន CNN ថា៖«គ្មាននរណាម្នាក់ដឹងថា«តើចំណាប់ខ្មាំងប៉ុន្មាននាក់នៅរស់ទេ ហើយបាននិយាយថា កិច្ចព្រមព្រៀងណាមួយ ដើម្បីដោះលែងពួកគេ ត្រូវតែរួមបញ្ចូលការធានានូវបទឈប់បាញ់ជាអចិន្ត្រៃយ៍ និងការដកកងកម្លាំងអ៊ីស្រាអែលទាំងស្រុង។

ការដោះលែងចំណាប់ថ្នូរអ៊ីស្រាអែលដែលមានកម្រិត គឺជាផ្នែកសំខាន់មួយនៃផែនការបទឈប់បាញ់បីផ្នែកដែលក្រុមសម្របសម្រួលអន្តរជាតិ រួមមានសហរដ្ឋអាមេរិក កាតា និងអេហ្ស៊ីប កំពុងព្យាយាមជួយចរចារវាងក្រុមហាម៉ាស និងអ៊ីស្រាអែល។

ជោគវាសនានៃចំណាប់ថ្នូរដែលត្រូវបានចាប់ខ្លួនដោយក្រុមភេរវករ ហើយត្រូវបាននាំយកទៅតំបន់ហ្កាហ្សា កាលពីថ្ងៃទី៧ ខែតុលា បានក្លាយជាបញ្ហានយោបាយក្នុងស្រុកដ៏តានតឹង និងរំជួលចិត្តបំផុតសម្រាប់នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ ដែលកំពុងប្រឈមនឹងការអំពាវនាវ        ពីសាធារណជន ឲ្យធ្វើបន្ថែមទៀត។

មនុស្សសរុបចំនួន ២៥១នាក់ ត្រូវបានចាប់ពង្រត់ ហើយ ១០៥នាក់ ត្រូវបានដោះលែង ក្នុងអំឡុងពេលបទឈប់បាញ់រយៈពេលមួយសប្តាហ៍ក្នុងខែវិច្ឆិកា។ ចំណែក ៧នាក់ ត្រូវបានជួយសង្គ្រោះពីការជាប់ឃុំឃាំងដោយកងកម្លាំងការពារអ៊ីស្រាអែល (IDF) រួមទាំង៤នាក់ កាលពីចុងសប្តាហ៍មុន។