​បាល់ទាត់៖ ​ក្របខណ្ឌ​អេ​ស្ប៉ា​ញ La Liga បានចាប់ផ្តើម​សប្តាហ៍​ទី១ រដូវ​កាល​ថ្មី​ហើយ​កាលពី​ចុង​សប្តាហ៍​កន្លងទៅ​ដំណាលគ្នា​នឹង​ក្រប​ខណ្ឌ English Premier League ដែរ ​ស្របពេល Barcelona រក​បាន​ជ័យជំនះ​ក្នុង​សប្តាហ៍​ដំបូង​លើ Real Sociedad ៤-២​។

​​នេះ​ជាការ​ចាប់ផ្តើម​ដំណើរ​ដែល​គ្មាន Lionel Messi បន្ទាប់ពី​កីឡាករ​អា​ហ្ស​ង់​ទីន​រូបនេះ​ចាកចេញ​ទៅកាន់ PSG​។​ ​​ខ្សែការពារ​ជើងចាស់​អេ​ស្ប៉ា​ញ Gerard Pique ជា​អ្នកបើក​ការនាំ​មុខ​នៅ​នាទី​ទី១៩ មុន​ពេលដែល​ខ្សែប្រយុទ្ធ​ដា​ណឺ​ម៉ាក Martin Braithwaite រកបាន ២​គ្រាប់​ផ្ទួនៗ​នៅ​នាទី​ទី៤៥+២ ចុង​វគ្គ​ទី១ និង​នាទី​ទី៥៩ នៅ​វគ្គ​ទី២​។ ​​ក្រុម​ភ្ញៀវ​ជិត​ចប់​ទៅ​ហើយក៏​រកបាន​ ២​គ្រាប់​មកវិញ​ដោយ Julen Lobete នាទី​ទី៨២ និង Mikel Oyarzabal នាទី​ទី៨៥ មានសង្ឃឹម​មកវិញ​ខ្លះ​តែ Sergi Roberto គឺជា​អ្នកសំរេច​គ្រាប់​ចុងក្រោយ​ឱ្យ Barcelona នៅ​នាទី​ទី៩០+១ ធានាបាន​ ៣ពិន្ទុ​។

​​ចំណែក​ក្រុម​ការពារ​តំណែង​ជើងឯក Atletico Madrid ក៏​រកបាន ៣​ពិន្ទុ​ដែរ​ក្រោយ​យកឈ្នះ​នៅ​ទឹកដី Celta Vigo ២-១ ដោយ​គ្រាប់​បាល់​ ២​គ្រាប់​របស់ Angel Correa ខណៈ Celta Vigo រកបាន​ ១​គ្រាប់​ដោយ Iago Aspas​។ ​​ខ្សែការពារ​អង់គ្លេស Kieran Trippier ដែលមាន​ទំនាក់ទំនង​ផ្ទេរ​មកកាន់​ទឹកដី​អង់គ្លេស​វិញ​ជាមួយ Manchester United រឺ Arsenal នោះ​ក៏មាន​វត្តមាន​ដែរ​ក្នុង​ការប្រកួត​នេះ​ដោយ​ផ្លាស់ប្តូរ​ចូល​នៅ​នាទី​ទី៦៦​។ ​​មួយគូ​ទៀត​កាលពី​ថ្ងៃ​សៅរ៍​វិញ Real Madrid ក៏បាន​យកឈ្នះ Deportivo Alaves ដោយ​លទ្ធផល ៤-១ ខណៈខ្សែប្រយុទ្ធ​បារាំង Karim Benzema រកបាន​ ២​គ្រាប់​ម្នាក់ឯង​។ ​​ក្រោយ​សប្តាហ៍​ដំបូង​នេះ​ឃើញ​ក្រុម​កំពូល​ទាំង​ ៤រដូវ​កាល​មុន​សុទ្ធតែ​ឈ្នះបូករួម​ទាំង Sevilla ដែល​បាន​យកឈ្នះ Rayo Vallecano ៣-០៕

​អត្ថបទ​៖​នាង សុភា​វុ​ធ