នាយទាហាន ពលទាហាននៃកងពលតូចដឹកជញ្ជូនលេខ៩៩ បានគាំទ្រ​ឲ្យមាន​ការប្រារព្ធ​«ទិវា​ចង​ចាំដំណើរឆ្ពោះទៅកាន់ការផ្តួលរំលំរបបប្រល័យពូជសាសន៍ ប៉ុល ពត»ជារៀងរហូត ដោយ​ពួក​គេ​ចាត់​ទុក​ថា ព្រឹត្តិការណ៍ជាប្រវត្តិសាស្រ្តនេះហើយដែលបាននាំឲ្យកម្ពុជា មានសុខសន្តិភាព និង​ការអភិវឌ្ឍរហូតដល់ សព្វថ្ងៃនេះ។

តាមរយៈកិច្ចសម្ភាសន៍ជាមួយទូរទស្សន៍BTV ទាក់ទងនឹងដំណើរឆ្ពោះទៅកាន់ការផ្តួលរំលំរបបប្រ ល័យ​ពូជសាសន៍របស់សមមិត្ត ហ៊ុន សែន និងយុទ្ធមិត្តចំនួន​បួនរូបទៀត​កាល​ពី​ជាង​៤០​ឆ្នាំមុ​ន​នោះ​ នាយទាហាន ពលទាហានទាំងប្រុស ទាំងស្រី នៃកងពលតូចដឹកជញ្ជូនលេខ៩៩ បាន​លើក​ឡើង​ថា ពួកគេពិតជាមានការស្ងប់ស្ងែងយ៉ាងខ្លាំង ចំពោះវារភាពដ៏ក្លាហានរបស់សមមិត្ត ហ៊ុន សែន ដែលបានលះបង់ប្រពន្ធកូនជាទីស្រលាញ់ បូជាសាច់ ស្រស់ឈាមស្រស់ដើម្បីជាតិមាតុភូមិ កាល​ពីថ្ងៃទី២០ ខែមិថុនា ឆ្នាំ១៩៧៧ ខណៈដំណើរដ៏គ្រោះថ្នាក់បំផុតនេះ គឺធ្វើឡើង​ដើ​ម្បី​រំដោះ​ប្រជាជន​កម្ពុជា​ឲ្យ​រួចផុតពីការកាប់សម្លាញ់យ៉ាងព្រៃផ្សៃពីសំណាក់របប ប៉ុល ពតនោះ។

ពួកគេបានលើកឡើងទៀតថា ដំណើរ​ជ្រែក​ស្បៃ​រាត្រី​ឆ្លង​កាត់​ព្រំដែន​ទាំង​គ្រោះ​ថ្នាក់​បំផុត​ឆ្ពោះ​ទៅ​កាន់​ប្រទេស​ជិតខាងរបស់សមមិត្តហ៊ុន សែន និងយុទ្ធមិត្តមួយចំនួនទៀត ដើម្បី​ស្វែង​រក​គាំទ្រ​ក្នុង​ការ​រំដោះ​ជាតិ និងប្រជាជនកម្ពុជា ចេញពីក្រញាំបិសាចដ៏សែនឃោរឃៅ ប៉ុល ពត គឺមិន​អាច​បំភ្លេច​បាន​នោះឡើយ ហើយក្នុងនាមជាយោធិនជំនាន់ក្រោយ ពួកគេសូម​ប្រកាស​គាំទ្រ​យ៉ាង​ពេញ​ទំហឹង​ឲ្យ​មានការប្រារព្ធ«ទិវាចងចាំទៅកាន់ការផ្តួលរំលំរបបប្រល័យពូជសាសន៍ ប៉ុល ពត»​នេះ​ជា​រៀង​រហូត ដើម្បីរំលឹកដល់ស្លាកស្នាមប្រវត្តិសាស្ត្រដ៏មានគុណតម្លៃសម្រាប់ជាតិ និង​ប្រជាជន ជាពិសេសឲ្យកូនខ្មែរជំនាន់ក្រោយៗទៀត បានយល់ដឹង និងចងចាំ​នូវ​ព្រឹត្តិការណ៍​ដ៏​សំខាន់​មួយ​នេះ។

សូមបញ្ជាក់ថា ថ្ងៃទី២០ ខែមិថុនា ឆ្នាំ២០២៤នេះគឺជារយៈពេល៤៧ឆ្នាំហើយ ដែល​សម្តេច​តេជោ ហ៊ុន សែន និងយុទ្ធមិត្តរួមអាវុធដ៏ស្មោះស្ម័គ្រ៤រូប បានរួម​គ្នាយក​ជីវិត​ធ្វើ​ជា​ដើម​ទុន​ចេញ​ទៅ​កាន់​ប្រទេសវៀតណាម ស្វែងរកការគាំទ្រ ដើម្បីតស៊ូរំដោះជាតិ និងប្រជាជនកម្ពុជា ចេញ​ពី​របប​ប្រល័យ​ពូជសាសន៍ដ៏ឃោរឃៅរបស់ខ្មែរក្រហម។

ដើម្បីរំលឹក​ដល់​គុណបំណាច់យ៉ាងធំធេងនេះ ក្រសួងការពារជាតិ បានសម្រេចយករាល់ថ្ងៃទី២០ ខែមិថុនា ប្រារព្ធទិវាចងចាំនេះ ហើយធ្វើឡើងនៅទីតាំងនៃការផ្តើមដំណើរតស៊ូរបស់សមមិត្តហ៊ុន សែន គឺនៅតំបន់X16 ក្នុងឃុំទន្លូង ស្រុកមេមត់ ខេត្តត្បូងឃ្មុំតែម្តង។សម្រាប់ខួបលើកទី៤៧ ឆ្នាំ​២០២៤នេះនឹង ប្រព្រឹត្តទៅក្រោមអធិបតីភាពរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី​នៃកម្ពុជា ជាមួយនឹងវត្តមានរដ្ឋមន្រ្តីក្រសួងការពារជាតិ និងមន្រ្តីជាន់ខ្ពស់​ក្នុង​ជួរ​រាជ​រដ្ឋាភិបាល​ជា​ច្រើនទៀត៕ អត្ថបទ៖ បាន ចក់