ក្រុមអឌ្ឍចន្ទក្រហមប៉ាឡេស្ទីន និយាយថា អ្នករងរបួស ត្រូវបានជម្លៀសចេញពីជំរំ Al-Bureij ស្ថិតនៅភាគកណ្តាលតំបន់ហ្កាហ្សាស្រ្ទីប កាលពីថ្ងៃអាទិត្យ ក្រោយការវាយប្រហាររបស់យន្តហោះអ៊ីស្រាអែលលើផ្ទះមួយខ្នង ។ 

អ្នកនាំពាក្យក្រុមអឌ្ឍចន្ទក្រហម និយាយថា ក្រុមការងាររបស់ពួកយើង រកឃើញសាកសពមនុស្ស ២នាក់ និងបញ្ជូនអ្នករងរបួសចំនួន ១៤នាក់ ទៅកាន់មន្ទីរពេទ្យ Al-Aqsa Martyrs ក្នុងទីក្រុង Deir al-Balah ស្ថិតនៅភាគកណ្តាលតំបន់ហ្កាហ្សាផងដែរ ។

វីដេអូទទួលបានពីក្រុមអឌ្ឍចន្ទក្រហម ឃើញពួកគេសែងមនុស្សលើកដាក់លើរថយន្តគិលានសង្រ្គោះ ក្នុងនោះមនុស្សម្នាក់បានសន្លប់ ហើយក្រុមការងារអឌ្ឍចន្ទក្រហម បានសែងមនុស្សម្នាក់ទៀតទៅកាន់មន្ទីរពេទ្យ Al-Aqsa ។

ទីភ្នាក់ងារព័ត៌មានរ៉យទ័រ អាចបញ្ជាក់ផ្ទៀងផ្ទាត់បានទីតាំងថតវីដេអូ ជាមួយនឹងស្លាកសញ្ញាធុរកិច្ច អគារ និងផែនទីផ្លូវ ដែលផ្គូផ្គងជាមួយរូបភាពផ្កាយរណប ហើយនិងអាចបញ្ជាក់បានកាលបរិច្ឆេតពីអ្នកនាំពាក្យក្រុមអឌ្ឍចន្ទក្រហម ៕