គណបក្ស Bharatiya Janata (BJP) របស់នាយករដ្ឋមន្ត្រីឥណ្ឌា Narendra Modi អាចនឹងបាត់បង់អាសនៈ នៅក្នុងការបោះឆ្នោតសកល ថ្មីៗនេះ ប៉ុន្តែការគាំទ្រសម្រាប់អ្នកនយោបាយដ៏មានប្រជាប្រិយបំផុតរបស់ប្រទេសរូបនេះ នៅតែរឹងមាំដដែល។

អ្នកជំនាញបានប្រាប់ប្រព័ន្ធផ្សព្វផ្សាយ CNA ថា ចំនួនខុសឆ្គងតិចតួច គឺជាគន្លឹះនៃជ័យជម្នះរបស់សម្ព័ន្ធរួមបញ្ចូលការអភិវឌ្ឈជាតិឥណ្ឌា (INDIA) នៅក្នុងរដ្ឋសមរភូមិសំខាន់ៗ ក្នុងនោះរួមទាំងរដ្ឋ Uttar Pradesh ដែលមានប្រជាជនច្រើនបំផុតផងដែរ។ ប្លុក INDIA ក៏ទទួលបានសំឡេងឆ្នោតច្រើនផងដែរ ពីអ្នកបោះឆ្នោតជាស្ត្រី ដោយមានចំនួន ៧ភាគរយ បើធៀបនឹងការបោះឆ្នោតកាលពីលើកមុន ក្នុងឆ្នាំ២០១៩។ លទ្ធផលនៃការបោះឆ្នោតរយៈពេលយូរ ក្នុងប្រទេសនេះ ត្រូវបានប្រកាសនៅដើមខែនេះ នាថ្ងៃទី៤ ខែមិថុនា។

ទោះបីជាអ្នកតាមដានព្រឹត្តិការណ៍ និងការស្ទង់មតិចេញពីការកន្លែងបោះឆ្នោត បានព្យាករពីជ័យជម្នះដ៏លើសលប់ សម្រាប់លោក Modi និងគណបក្ស BJP របស់លោក ដែលកំពុងកាន់អំណាចនោះ ក៏ចុងក្រោយគណបក្សនេះ បានបរាជ័យក្នុងការឈ្នះសំឡេងភាគច្រើននៅក្នុងសភាជាលើកដំបូង ក្នុងរយៈពេល១ទសវត្សរ៍។

គណបក្ស BJP បានបង្កើតរដ្ឋាភិបាលជាមួយគណបក្សសម្ព័ន្ធមិត្ត ដោយដឹកនាំសម្ព័ន្ធប្រជាធិបតេយ្យជាតិ (NDA) ដែលមានសមាជិកចំនួន ១៥ និងរដ្ឋាភិបាលចម្រុះមានអាសនៈសរុបចំនួន២៩៣ ក្នុងសភា ដើម្បីគ្រប់គ្រងស្ថាប័ននីតិប្បញ្ញត្តិ។ លោក Modi បានស្បថចូលកាន់តំណែងអាណត្តិទី៣ កាលពីថ្ងៃទី៩ ខែមិថុនា។

ការវិភាគចុងក្រោយនៃការបោះឆ្នោតរបស់ប្រព័ន្ធផ្សព្វផ្សាយរបស់ CNA បានបង្ហាញថា ទោះបីជាអ្វីដែលមើលទៅដូចជាការធ្លាក់ចុះយ៉ាងខ្លាំងសម្រាប់គណបក្ស BJP ក៏ដោយ ក៏ចំណែកសន្លឹកបោះឆ្នោតរបស់គណបក្សនៅឆ្នាំនេះ បានធ្លាក់ចុះត្រឹមតែបន្តិចប៉ុណ្ណោះ ពោលគឺតិចជាង ១ភាគរយ៕