នគរបាលបានឲ្យដឹងថា រថភ្លើងដឹកទំនិញមួយគ្រឿងបានបុកពីក្រោយរថភ្លើងដឹកអ្នកដំណើរដែលឈប់នៅស្ងៀម ក្នុងរដ្ឋ West Bengal របស់ប្រទេសឥណ្ឌា នៅថ្ងៃចន្ទ (១៧ មិថុនា) ដោយបានបណ្ដាលឲ្យមនុស្សយ៉ាងហោចណាស់ ១៥នាក់ ស្លាប់ និងរាប់សិបនាក់ទៀត រងរបួស ដោយនេះជាឧបទ្ទវហេតុដែលអាជ្ញាធរផ្លូវដែកបានស្តីបន្ទោសថា មកពីភាពធ្វេសប្រហែសរបស់អ្នកបើកបរ។

រូបភាពពីវីដេអូឃ្លីបបានបង្ហាញឲ្យឃើញនូវសមាជិកនៃកងកម្លាំងឆ្លើយតបគ្រោះមហន្តរាយជាតិ (NDRF) ធ្វើប្រតិបត្តិការជួយសង្គ្រោះ នៅជិតទូរថភ្លើងដែលមានសភាពខ្ទេចខ្ទី ដោយមានទូរថភ្លើងមួយស្ទើរតែបញ្ឈរឡើងលើ បន្ទាប់ពីគ្រោះថ្នាក់នោះ។

លោក Jaya Varma Sinha ប្រធានក្រុមប្រឹក្សាផ្លូវដែក ដែលដំណើរការបណ្តាញទូទាំងប្រទេស បានប្រាប់អ្នកសារព័ត៌មានថា គ្រោះថ្នាក់នេះបានកើតឡើង បន្ទាប់ពីអ្នកបើកបររថភ្លើងដឹកទំនិញ មិនគោរពការឲ្យសញ្ញា ហើយបានទៅបុកពីក្រោយរថភ្លើងល្បឿនលឿន។

គួរបញ្ជាក់ថា រថភ្លើងដឹកទំនិញ បានបុករថភ្លើង Kanchanjunga Express ដែលធ្វើដំណើរពីរដ្ឋ Tripura ភាគឦសាន ទៅកាន់រដ្ឋធានី Kolkata របស់រដ្ឋ West Bengal ដោយឧបទ្ទវហេតុនោះ បានបណ្ដាលឲ្យទូរថភ្លើងដឹកអ្នកដំណើរ ៣ទូ ធ្លាក់ចេញពីផ្លូវ៕