ភាគីថៃនឹងរក្សាគោលការណ៍មិនយកកម្រៃសេវា ចំពោះយានយន្តដែលឆ្លងកាត់ស្ពាន​មិត្តភាព​កម្ពុជា​-ថៃ (ស្ទឹងបត់-បាងណង អៀង) ស្របតាមការស្នើសុំរបស់ភាគីកម្ពុជា ដើម្បី​កម្ពស់​ដល់​ការ​នាំ​ទំ​និញចេញ-ចូលទំនិញរវាងប្រទេសទាំងពីរ។

ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ជួបប្រជុំទ្វេភាគីជាមួយ ឯកឧត្តម ស៊ុរិយៈ ជឹងរុងរឿងគីត (Suriya Jungrungreangkit) ឧបនាយករដ្ឋមន្រ្តី រដ្ឋមន្រ្តី​ក្រសួង​ដឹកជញ្ជូន នៃព្រះរាជាណាចក្រថៃ នៅថ្ងៃទី ១៧ ខែ មិថុនា ឆ្នាំ ២០២៤ នេះ បានពិភាក្សា​លើ​ការ​គ្រប់គ្រង ថែទាំ និងប្រើប្រាស់សា្ពនមិត្តភាពកម្ពុជា-ថៃ (ស្ទឹងបត់-បាងណងអៀង) តាមរយៈ​ ប្រព័ន្ធវីដេអូ ដោយមានការអញ្ជើញចូលរួមពីសំណាក់ថ្នាក់ដឹកនាំ និងមន្រ្តីជំនាញ​នៃ​ក្រសួង​ទាំងពីរ បន្ទាប់ពីទទួលបានអនុសាសន៍ ណែនាំដ៏ខ្ពង់ខ្ពស់ ពីសម្តេច​មហាបវរ​ធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា។

 ជាលទ្ធផល ភាគីថៃ បានបញ្ជាក់ជូនភាគីកម្ពុជាថា ខណៈពេលនេះ ភាគីថៃនឹង​រក្សា​គោលការណ៍​មិន​យក​កម្រៃ​សេវា ចំពោះ យានយន្តដែលឆ្លងកាត់ស្ពានមិត្តភាពនេះ ស្របតាមការ​ស្នើ​សុំ​របស់​ភាគី​កម្ពុជា។ ទន្ទឹមនឹងនេះ ភាគីទាំងពីរក៏បានឯកភាពគ្នាក្នុងការ ពិនិត្យ មើលពេលវេលា​សម​ស្រប​មួយរៀបចំកិច្ចប្រជុំក្នុងក្របខណ្ឌកិច្ចសហប្រតិបត្តិការដឹកជញ្ជូនទ្វេភាគី និងកម្មវិធីចុះ​ទៅ​ពិនិត្យទីតាំងជាក់ស្ដែង នៅច្រកទ្វារព្រំដែនអន្តរជាតិស្ទឹងបត់-បាណងអៀន នាពេលខាងមុខ។

ជំនួបពិភាក្សាទ្វេភាគីនេះ ប្រព្រឹត្តទៅក្រោមបរិយាកាសស្និទ្ធសា្នល និងក្នុង​សា្មរតី​ភាព​ជាដៃគូ​ដ៏​ល្អ​រវាង​ប្រទេសទាំងពីរ ហើយថ្នាក់ដឹកនាំនៃក្រសួងទាំងពីរ បានឯកភាពគ្នាបន្តពង្រឹង និងពង្រីក​កិច្ច​សហ​ប្រតិបត្តិការក្នុងវិស័យដឹកជញ្ជូន និងការតភ្ជាប់រវាង ប្រទេសជិត​ខាង​ទាំង​ពីរ​ឱ្យ​បាន​កាន់​តែ​ល្អប្រ​សើរ។

សូមបញ្ជាក់ថា សា្ពនមិត្តភាពកម្ពុជា-ថៃ (ស្ទឹងបត់-បាងណងអៀង) បានផ្តល់​អត្ថ​ប្រយោជន៍​យ៉ាង​ធំធេង​ដល់​សេដ្ឋកិច្ចជាតិ តាមរយៈការធ្វើពាណិជ្ជកម្មឆ្លងកាត់ព្រំដែន ការបង្កើតការងារ និងការ​ទាក់​ទាញ​ភ្ញៀវទេសចរ ក៏ដូចជាការសម្រេចឱ្យបាននូវចក្ខុវិស័យរបស់អាស៊ាន ក្នុងការ​តភ្ជាប់​ប្រទេស​នៅ​ក្នុងតំបន់អាស៊ានទាំងមូលផងដែរ៕ អត្ថបទ៖ សុន រ៉ាឌី