ការវាយប្រហារតាមអាកាសរបស់អ៊ីស្រាអែល នៅថ្ងៃអង្គារ (ទី១៧ ខែមិថុនា) បានសម្លាប់ជនជាតិប៉ាឡេស្ទីនយ៉ាងហោចណាស់ ១៧នាក់ នៅក្នុងជំរុំជនភៀសខ្លួនដ៏សំខាន់របស់តំបន់ហ្កាហ្សាស្ទ្រីប ហើយរថក្រោះរបស់អ៊ីស្រាអែល បានលុកចូលកាន់តែជ្រៅទៅក្នុងទីក្រុង Rafah ភាគខាងត្បូងរបស់ដែនដីនេះ។

អ្នកស្រុកបានរាយការណ៍ពីការវាយប្រហារដោយគ្រាប់បែកយ៉ាងខ្លាំងក្លាទាំងពីរថក្រោះ និងយន្តហោះ នៅក្នុងតំបន់ជាច្រើនរបស់ទីក្រុង Rafah ជាកន្លែងដែលមនុស្សជាង ១លាននាក់ បានយកធ្វើជាទីជម្រក នៅមុនខែឧសភា។ ប្រជាជនភាគច្រើនបានភៀសខ្លួនទៅភាគខាងជើងចាប់តាំងពីពេលនោះមក ខណៈដែលកងកម្លាំងអ៊ីស្រាអែល បានលុកលុយទីក្រុងនេះ។

យោធាអ៊ីស្រាអែលបាននិយាយថា ខ្លួនកំពុងបន្ត «សកម្មភាពផ្អែកលើមូលដ្ឋានស៊ើបការណ៍សម្ងាត់ដែលមានភាពច្បាស់លាស់ នៅក្នុងទីក្រុង Rafah ដោយបានសម្លាប់ខ្មាន់កាំភ្លើងប៉ាឡេស្ទីនជាច្រើននាក់ ក្នុងរយៈពេល ១ថ្ងៃកន្លងមក នៅក្នុងការប្រយុទ្ធគ្នាចម្ងាយជិត ហើយរឹបអូសបានអាវុធជាច្រើន។ យោធាបានបន្ថែមទៀតថា កងទ័ពអាកាស បានវាយប្រហារគោលដៅរាប់សិប នៅទូទាំងតំបន់ហ្កាហ្សាស្ទ្រីប ក្នុងថ្ងៃកន្លងមក។

ក្រុមគ្រូពេទ្យបានប្រាប់ឲ្យដឹងថា នៅកណ្តាលតំបន់ហ្កាហ្សាស្ទ្រីប ការវាយប្រហារតាមអាកាស ២ ដាច់ដោយឡែកពីគ្នារបស់អ៊ីស្រាអែលលើផ្ទះ ២ខ្នង បានសម្លាប់ជនជាតិប៉ាឡេស្ទីន ១៧នាក់ នៅ Al-Nuseirat និង Al-Bureij ជាជំរុំជនភៀសខ្លួនចំនួន២ ដែលត្រូវបានបង្កើតឡើង សម្រាប់ជាទីកន្លែងជ្រកកោនរបស់ក្រុមគ្រួសារ និងកូនចៅរបស់ប្រជាជន ដែលបានភៀសខ្លួនទៅតំបន់ហ្កាហ្សា អំឡុងសង្រ្គាមឆ្នាំ១៩៤៨ ដែលជម្លោះនោះបានផ្ទុះឡើងពាក់ព័ន្ធនឹងការបង្កើតប្រទេសអ៊ីស្រាអែល៕