ដោយផ្អែកលើការស្ទង់មតិលើម្ចាស់អាជីវកម្មជាច្រើនរូប ក្រុមហ៊ុនប្រឹក្សាយោបល់ EY នៅថ្ងៃពុធ (ទី១៩ ខែមិថុនា) នេះ បានឲ្យដឹងថា អឺរ៉ុបត្រូវតែជំរុញឲ្យមានស្ថិរភាពនយោបាយកាន់តែប្រសើរជាងនេះ បញ្ឈប់សកម្មភាពការិយាធិបតេយ្យហួសហេតុ និងកាត់បន្ថយការប្រែប្រួលតម្លៃថាមពល ដើម្បីកែប្រែនិន្នាការដែលកំពុងធ្លាក់ចុះ សម្រាប់ការវិនិយោគរបស់បរទេស។

គួរបញ្ជាក់ថា អឺរ៉ុបបានជួបការលំបាកផ្នែកសេដ្ឋកិច្ចអស់រយៈពេលជាច្រើនឆ្នាំមកហើយ ដោយសារតម្លៃឡើងខ្ពស់ និងឥទ្ធិពលអាក្រក់ពីសង្រ្គាមរបស់រុស្ស៊ី នៅប្រទេសអ៊ុយក្រែន រហូតជំរុញឲ្យមានអារម្មណ៍ប្រជានិយម ដែលបានជួយលើកក្រុមស្ដាំជ្រុលនិយម នៅក្នុងការបោះឆ្នោតសភាអឺរ៉ុប និងបានជំរុញឲ្យប្រធានាធិបតីបារាំង លោក Emmanuel Macron ប្រកាសពីការបោះឆ្នោតជាតិមុនអាណត្តិ។

កំណើនដែលនៅទ្រឹង ការប្រែប្រួលខ្លាំងនៃតម្លៃថាមពល និងភាពមិនប្រាកដប្រជាខាងនយោបាយ បានធ្វើឲ្យប៉ះពាល់យ៉ាងខ្លាំងក្លាដល់ភាពប្រកួតប្រជែងរបស់ប្លុក ជាពិសេសនៅពេលប្រៀបធៀបទៅនឹងការរីកចម្រើនរបស់សហរដ្ឋអាមេរិក ពោលគឺធ្វើឲ្យប្លុកសេដ្ឋកិច្ចដ៏ធំបំផុតទាំង២ របស់ពិភពលោកនេះ ស្ថិតនៅលើផ្លូវផ្ទុយគ្នាស្រឡះ។

នាយកប្រតិបត្តិជាង ៥០០នាក់ ដែលត្រូវបានស្ទង់មតិ ដាក់ចំណាត់ថ្នាក់អស្ថិរភាពនយោបាយ ក្នុងនោះរួមទាំងការបោះឆ្នោតនាពេលខាងមុខផងដែរ ប្រជាជននិយម និងការយល់ឃើញខុសគ្នា ជាហានិភ័យធំបំផុតទី២ ដែលត្រូវបានជាប់គាំងដោយការកើនឡើងនូវបន្ទុកបទប្បញ្ញត្តិ៕