គ្រួសាររបស់ជនរងគ្រោះ ក្នុងហេតុការណ៍ធ្លាក់យន្តហោះ Boeing 737 MAX កាលពីថ្ងៃពុធ (ទី១៩ មិថុនា) បានស្នើឲ្យអាជ្ញាធរសហរដ្ឋអាមេរិកដាក់ពិន័យរហូតដល់ ២៤,៨ពាន់លានដុល្លារអាមេរិក ចំពោះក្រុមហ៊ុនអាកាសចរណ៍ដ៏ធំបំផុតមួយនេះ ហើយបន្តចំណាត់ការដោយការកាត់ទោសកម្រិតព្រហ្មទណ្ឌ។

ការទាមទារនេះកើតឡើង ១ថ្ងៃបន្ទាប់ពីនាយកប្រតិបត្តិក្រុមហ៊ុន Boeing លោក Dave Calhoun បានទទួលស្គាល់ពី «ភាពធ្ងន់ធ្ងរ» នៃបញ្ហាសុវត្ថិភាពរបស់ក្រុមហ៊ុន និងបានធានាដល់ក្រុមសមាជិកសភាអាមេរិកថា ខ្លួនកំពុងដំណើរការលើបញ្ហានេះ។

អង្គុយនៅពីក្រោយលោក Calhoun ក្នុងចំណោមអ្នកចូលរួម គឺជាសាច់ញាតិរបស់ជនរងគ្រោះ ក្នុងឧបទ្ទវហេតុធ្លាក់យន្តហោះ Boeing 737 MAX 8 ក្នុងឆ្នាំ២០១៨ និងឆ្នាំ២០១៩ ដោយអ្នកទាំងនោះមានកាន់រូបថតជនរងគ្រោះ នៅក្នុងដៃ។

នៅក្នុងលិខិតមួយទៅកាន់ក្រសួងយុត្តិធម៌អាមេរិក មេធាវីតំណាងឲ្យក្រុមគ្រួសារនៃជនរងគ្រោះទាំងនោះ គឺលោក Paul Cassell បានសរសេររៀបរាប់ថា៖ «ដោយសារឧក្រិដ្ឋកម្មរបស់ក្រុមហ៊ុន Boeing គឺជាឧក្រិដ្ឋកម្មសាជីវកម្មបណ្ដាលឲ្យមានអ្នកស្លាប់ច្រើនបំផុត ក្នុងប្រវត្តិសាស្ត្រអាមេរិក ការទាមទារឲ្យមានការផាកពិន័យអតិបរមាជាង ២៤ពាន់លានដុល្លារអាមេរិក គឺមានភាពយុត្តិធម៌ និងត្រឹមត្រូវយ៉ាងច្បាស់លាស់»។

លិខិតនោះបានបន្ថែមថា៖ «ហើយក្រុមប្រឹក្សាភិបាលរបស់ក្រុមហ៊ុន Boeing គួរតែត្រូវបានបញ្ជាឲ្យជួបជាមួយក្រុមគ្រួសាររបស់ជនរងគ្រោះ»។ ចំណែកគ្រួសារទាំងអស់នោះក៏ជឿដូចគ្នាដែរថា រដ្ឋាភិបាលគួរតែ «ចាប់ផ្តើមការកាត់ទោសកម្រិតព្រហ្មទណ្ឌ ចំពោះមន្ត្រីសាជីវកម្មដែលទទួលខុសត្រូវនៅក្រុមហ៊ុន Boeing នៅពេលមានឧបទ្ទវហេតុទាំង២ នេះ»។

គួរបញ្ជាក់ថា ករណីនេះទាក់ទងនឹងការធ្លាក់យន្តហោះ ក្នុងឆ្នាំ២០១៨ និងឆ្នាំ២០១៩ នៅក្នុងប្រទេសឥណ្ឌូនេស៊ី និងអេត្យូពី ដែលបានបណ្ដាលឲ្យមនុស្សចំនួន ៣៤៦នាក់ ស្លាប់ ហើយការទាមទារនេះ កើតឡើងក្នុងពេលដែលក្រុមហ៊ុន Boeing ប្រឈមនឹងការត្រួតពិនិត្យកាន់តែខ្លាំងឡើងៗ បន្ទាប់ពីមានបញ្ហាផលិតកម្ម និងសុវត្ថិភាព នាពេលថ្មីៗនេះ៕