ប្រធានាធិបតី វ្ល៉ាឌីមៀ ពូទីន (Vladimir Putin) កាលពីថ្ងៃព្រហស្បតិ៍ (២០ មិថុនា) បានចោទប្រកាន់សម្ព័ន្ធមិត្តយោធា ណាតូ (NATO) ថាបានបង្កើតការគំរាមកំហែងសន្តិសុខសម្រាប់ប្រទេសរុស្ស៊ី និងប្រជាជាតិដទៃទៀតនៅក្នុងតំបន់អាស៊ី។

លោក ពូទីន បានប្រាប់សន្និសីទសារព័ត៌មានក្នុងប្រទេសវៀតណាម នៅចុងបញ្ចប់នៃដំណើរទស្សនកិច្ចរយៈពេលពីរថ្ងៃទៅកាន់អាស៊ី ថា «យើងមើលឃើញនូវអ្វីដែលកំពុងកើតឡើងនៅអាស៊ី គឺប្រព័ន្ធប្លុកមួយនេះកំពុងរួមដៃគ្នាកាន់តែខ្លាំងឡើង»។

លោកបានបន្ថែមថា «ណាតូ កំពុងឆ្ពោះទៅកាន់ទ្វីបអាស៊ី ហាក់ដូចជាកន្លែងស្នាក់នៅអចិន្ត្រៃយ៍របស់ខ្លួន ហើយពិតណាស់ នេះបង្កើតការគំរាមកំហែងយ៉ាងខ្លាំងដល់ប្រទេសទាំងអស់នៅក្នុងតំបន់ រួមទាំងសហព័ន្ធរុស្ស៊ីផងដែរ។ យើងមានកាតព្វកិច្ចឆ្លើយតបចំពោះបញ្ហានេះ ហើយយើងនឹងធ្វើវា»។

ដោយមានការព្រួយបារម្មណ៍ពីអំណាចយោធាដែលកំពុងកើនឡើងរបស់ចិន សហរដ្ឋអាមេរិក បានជំរុញឱ្យអង្គការណាតូ ចែករំលែកជំនាញ និងកសាងទំនាក់ទំនងជាមួយប្រទេសមួយចំនួនដូចជា ជប៉ុន កូរ៉េខាងត្បូង អូស្ត្រាលី និងនូវែលសេឡង់។

ដោយមានជម្លោះជាមួយអង្គការណាតូ ជុំវិញសង្គ្រាមរបស់ខ្លួននៅអ៊ុយក្រែន លោក ពូទីន មើលសម្ព័ន្ធយោធានេះថាជាសត្រូវ ហើយបានចោទប្រកាន់ថា ណាតូ បានបញ្ឆោតរុស្ស៊ី ដោយផ្តល់សមាជិកភាពដល់បណ្ដាប្រទេសអឺរ៉ុបខាងកើត បន្ទាប់ពីការដួលរលំនៃសហភាពសូវៀតក្នុងឆ្នាំ១៩៩១៕