តាជីគីស្ថាន៖ ប្រទេសរុស្ស៊ីកាលពីថ្ងៃអង្គារបានចាប់ផ្ដើមសមយុទ្ធយោធារួមគ្នា ជាមួយតាជីគីស្ថានក្បែរព្រំដែនអាហ្វហ្គានីស្ថាន បន្ទាប់ពីក្រុមតាលីបង់ដណ្ដើមបានទីក្រុងកាប៊ុល។
ក្រសួងការពារជាតិរុស្ស៊ីបាននិយាយនៅក្នុងសេចក្ដីថ្លែងការណ៍មួយថា ទាហានរុស្ស៊ីប្រហែល ១.០០០នាក់មកពីមូលដ្ឋានយោធាលេខ ២០១ នៅតាជីគីស្ថានបានចូលរួមក្នុងសមយុទ្ធនេះព្រមទាំងរថក្រោះ កាំភ្លើងធំ ឧទ្ធម្ភាគចក្រ និងយានដ្រូន។ វីដេអូបង្ហាញពីការបាញ់កាំភ្លើងធំឆ្ពោះទៅតំបន់ភ្នំក្នុងប្រទេសតាជីគីស្ថាន ខណៈទាហានបានបាញ់កាំភ្លើងយន្តពីឧទ្ធម្ភាគចក្រ។ ក្រសួងការពារជាតិរុស្ស៊ីបាននិយាយថា សមយុទ្ធយោធានេះនឹងបន្តនៅមូលដ្ឋានបរទេសធំបំផុតរបស់រុស្ស៊ីរយៈពេលមួយខែ។
ព្រំដែនរវាងតាជីគីស្ថាន-អាហ្វហ្គានីស្ថានលាតសន្ធឹងលើផ្ទៃដីប្រវែងជាង ១៣០០គីឡូម៉ែត្រ។ រុស្ស៊ីបានសន្យាផ្តល់ជំនួយយោធាដល់សម្ព័ន្ធមិត្តរបស់ខ្លួន និងបណ្ដាប្រទេសអាស៊ីកណ្ដាលអតីតសហភាពសូវៀតផ្សេងទៀត ប្រសិនបើពួកគេប្រឈមនឹងការលុកលុយពីពួកសកម្មប្រយុទ្ធពីអាហ្វហ្គានីស្ថាន៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
