សត្វដង្កូវហ្វូង បាននឹងកំពុងបំផ្លាញស្រូវវស្សាជាង១២០០ហិកតា និងដំឡូងមីជិត៣០០ហិក នៅ​តាម​ស្រុក​មួយចំនួនក្នុងខេត្តសៀមរាប ប៉ុន្ដែបើគ្មានចាត់វិធានការទាន់ពេលវេលាទេ វាអាច​ប៉ះ​ពាល់​ធ្ងន់​ធ្ងរ​ដល់ទិន្នផលស្រូវ និងរាលដាលទៅស៊ីស្រូវកន្លែងផ្សេងៗទៀត។

លោក ទា គឹមសុទ្ឋ ប្រធានមន្ទីរកសិកម្ម រុក្ខាប្រម៉ាញ់ និងនេសាទ ខេត្តសៀមរាប មានប្រសាសន៍​នៅ​ក្នុង​កិច្ច​ប្រជុំបូកសរុបលទ្ធផលការងារឆមាសទី១  និងទិសដៅបន្តឆមាសទី២ឆ្នាំ២០២៤ ដែល​រៀប​ចំ​ឡើងនៅស្ថានីយស្រាវជ្រាវកសិកម្មទឹកវិល ក្រុងសៀមរាប កាលពីម្សិលមិញ​។​លោក​បាន​ថ្លែង​ថា ប្រជាកសិករត្រូវមានការប្រុងប្រយ័ត្នចំពោះសត្វដង្កូវហ្វូង ដោយត្រូវ​ពិនិត្យ​តាម​ដាន​ជា​ប្រចាំ​ទៅលើ​ដំណាំស្រូវ និងដំណាំប្រភេទស្លឹក និងមានវិធានការទប់ស្កាត់ តាមការណែនាំ​របស់​មន្ត្រី​កសិកម្ម។

លោកបានជំរុញនិងអំពាវនាវឱ្យគ្រប់ភាគីពាក់ព័ន្ឋបន្តតាមដាន និង​រាយការ​ណ៍​ឱ្យ​បាន​ជា​ប្រចាំនូវស្ថានភាពរាតត្បាតរបស់សត្វដង្កូវហ្វូង ខណៈដែលហ្វូងដង្កូវនោះ បាន​លុក​លុយ​ចូល​ក្នុង​ស្រុកចំនួន៧ក្នុងចំណោម១៣ក្រុងស្រុករបស់ខេត្ត និងបំផ្លាញ​សន្ទូង​អស់​ជាង​១២០០​ហិកតា និង​ដំឡូងមីជិត៣០០ហិកតា។ដង្កូវហ្វូងបានកើតច្រើននៅអំឡុពាក់កណ្តាខែមិថុនាមក ហើយ​បានបំផ្លាញស្រូវក្នុងសហគមន៍ស្រូវ​នាង​អំ​ប្រមាណ​ជាជាង​៧០​ហិកតាក្នុ​ង​ចំណោម​៣០០​ហិកតា​ទៀត​នៅ​ក្នុងសហគមន៍កសិករនៅស្រុកស្វាយលើ ហើយថ្នាក់ដឹកនាំក្រសួង​រួម​ជា​មួយ​មន្ទីរ​បាន​ចុះ​អន្តរាគមន៍ទាន់ពេលវេលា ដោយបានណែនាំពីវិធីសាស្ត្របំផ្លាញនិងការពារ និងផ្តល់​ថ្នាំ​សម្រាប់​សម្លាប់សត្វល្អិតជាដើមដើម្បីកម្ចាត់ដង្កូវហ្វូង។

លោក ទា គឹមសុទ្ឋ បានឱ្យដឹងថា សត្វ​ដង្កូវ​ហ្វូង​នេះ នៅពេលវាញាស់លឿនហើយវាធំលឿន និងបំផ្លាញស្រូវ​និង​ដំណាំប្រ​ភេទ​ស្លឹក​ក៏​លឿន​ដែរ បើមិនបានពិនិត្យមើលឪ្យបានហ្មត់ចត់ និងមិនចាត់វិធានការទាន់ពេលវេលាទេ វាអាច​ប៉ះ​ពាល់​ធ្ងន់ធ្ងរដល់ទិន្នផលស្រូវ និងរាលដាលទៅស៊ីស្រូវកន្លែងផ្សេងៗទៀត ។លោកបន្ថែមថា សត្វ​ដង្កូវរយនេះ គឺកើតឡើងមកពីសត្វមេអំបៅ ដែលហើរចល័តចេញពីប្រទេសក្បែរយើង រក​កន្លែង​ពង​ញាស់​ក្នុងប្រទេសកម្ពុជា ដោយលោកអំពាវនាវដល់ប្រជាកសិករ ត្រូវចុះពិនិត្យ​តាម​ដាន​មើល​ស្រូវ​របស់ខ្លួនឱ្យជាប់ជានិច្ច ដើម្បីការពារស្រូវពីសត្វដង្កូវ។ជាពិសេសពិនិត្យមើលពេលព្រឹកព្រលឹម និងពេលល្ងាច។ ​ជាមួយគ្នានេះការបាញ់ថ្នាំសម្លាប់ដង្កូវ ត្រូវមានការប្រយ័ន្ន​ខ្ពស់​កុំ​ឱ្យប៉ះពាល់​ដល់​សុខភាព​៕