លោកប្រធានាធិបតីហ្វីលីពីន Ferdinand Marcos បាននិយាយកាលពីថ្ងៃអាទិត្យ ២៣ មិថុនា ថាប្រទេសរបស់លោកពុំស្ដាប់ការញុះញង់បង្កសង្រ្គាមឡើយ ហើយតែងតែមានគោលបំណងដើម្បីដោះស្រាយជម្លោះដោយសន្តិវិធី ខណៈមានការប្រឈមដាក់គ្នាក្នុងដែនសមុទ្រកាន់តែខ្លាំងជាមួយប្រទេសចិន។

លោក Marcos បាននិយាយនៅក្នុងសុន្ទរកថាទៅកាន់កងទ័ពនៃអង្គភាពបញ្ជាការខាងលិចដែលទទួលបន្ទុកឃ្លាំមើលសកម្មភាពនៅសមុទ្រចិនខាងត្បូងថា ក្នុងការការពារជាតិ យើងរក្សាភាពស្មោះត្រង់ចំពោះធម្មជាតិហ្វីលីពីនរបស់យើង ហើយយើងចង់ដោះស្រាយបញ្ហាទាំងអស់នេះដោយសន្តិវិធី។ 

បុគ្គលិកកងទ័ពជើងទឹកហ្វីលីពីន និងឆ្មាំល្បាតឆ្នេរចិនបានប៉ះទង្គិចគ្នាចុងក្រោយរបស់ពួកគេកាលពីសប្តាហ៍មុននៅក្នុងផ្លូវទឹកមានជម្លោះ ជាទីដែលយោធាហ្វីលីពីនបាននិយាយថានាវិកហ្វីលីពីនម្នាក់បានរងរបួសធ្ងន់ ហើយនាវារបស់ខ្លួនបានខូចខាត។  

យោធាហ្វីលីពីនបាននិយាយថា បុគ្គលិកឆ្មាំល្បាតឆ្នេរបស់ចិនប្រដាប់ដោយកាំបិត លំពែង និង ពូថៅវាយប្រហារដោយចេតនាលើទូកហ្វីលីពីនដែលចូលរួមក្នុងបេសកកម្មនេះ៕