មនុស្សជាង ១០០ លាននាក់នៅទូទាំងសហរដ្ឋអាមេរិក បានស្ថិតក្រោមការព្រមានអំពីកម្ដៅដ៏ក្ដៅគគុក កាលពីថ្ងៃអាទិត្យ (២៣ មិថុនា) ដោយទីក្រុងនានានៅឆ្នេរសមុទ្រភាគខាងកើត កំពុងទប់ទល់នឹងសីតុណ្ហភាពកម្រិតបំបែកកំណត់ត្រា ខណៈកម្ដៅដែលបណ្តាលឱ្យមានលក្ខខណ្ឌដ៏គ្រោះថ្នាក់បានពង្រីកទៅដល់តំបន់ឆ្នេរភាគខាងលិច។

ទីក្រុង បាល់ទីម័រ (Baltimore) និងទីក្រុង ហ្វីឡាឌែលហ្វៀ (Philadelphia) បានជួបប្រទះកម្ដៅដ៏ខ្លាំងក្លាមិនធ្លាប់មានជិត ៣៨ អង្សាសេកាលពីថ្ងៃអាទិត្យ ខណៈដែលសីតុណ្ហភាពកើនឡើងដល់ជាង ៣២ អង្សាសេនៅក្នុងបណ្ដារដ្ឋដូចជា អាដាហូ (Idaho), ម៉ុនថាណា (Montana) និង វ៉ៃអូមីង (Wyoming) រហូតដល់ ១៥ អង្សាសេលើសពីធម្មតាសម្រាប់ឆ្នាំនេះ។ សេវាអាកាសធាតុជាតិ (NWS) បាននិយាយថាកម្ដៅដ៏ខ្លាំងនេះ បន្ទាប់មកនឹងផ្លាស់ប្តូរទៅរដ្ឋ ណេប្រាស្កា (Nebraska) និង ខែនសាស (Kansas) នៅថ្ងៃចន្ទនេះ។

ក្រុមមន្ត្រីកំពុងព្រមានអំពីស្ថានភាពគ្រោះថ្នាក់នៅក្នុងតំបន់ ហ្វីឡាឌែលហ្វៀ ដែលសំណើមខ្ពស់អាចជំរុញសន្ទស្សន៍កម្ដៅលើសពី ៤១ អង្សាសេ ដែលធ្វើឱ្យការមានអារម្មណ៍ក្តៅ (សីតុណ្ហភាពនៅកន្លែងបិទជិត) ក្ដៅខ្លាំងជាងសីតុណ្ហភាពជាក់ស្តែង។

សីតុណ្ហភាពបានចុះត្រជាក់បន្តិចនៅតំបន់ជ្រលងភ្នំ អូហាអូ (Ohio Valley), តំបន់បឹង ហ្គ្រេតលេកស៍ (Great Lakes) និងតំបន់ ញ៉ូវអ៊ីងលែន (New England) ប៉ុន្តែកម្ដៅខ្លាំងក្នុងកម្រិតលើសពី ៣០ អង្សាសេ នៅតែបន្តលាតសន្ធឹងពីរដ្ឋ វើជីនៀ (Virginia) ទៅ ញូវយ៉ក (New York)។ ការស្រាវជ្រាវបង្ហាញថា បម្រែបម្រួលអាកាសធាតុកំពុងជំរុញរលកកម្ដៅដ៏គ្រោះថ្នាក់នៅទូទាំងអឌ្ឍគោលខាងជើងក្នុងសប្តាហ៍នេះ ហើយនឹងបន្តផ្តល់អាកាសធាតុដ៏គ្រោះថ្នាក់សម្រាប់ប៉ុន្មានទសវត្សរ៍ខាងមុខទៀត៕