មន្ត្រីប្រទេសរុស្ស៊ី និយាយកាលពីថ្ងៃអាទិត្យថា អ៊ុយក្រែនបានវាយប្រហារឧបទ្វីបគ្រីម៉េ ដែលភ្ជាប់ឧបសម្ព័ន្ធរបស់រុស្សី ដោយប្រើប្រាស់មីស៊ីលផ្គត់ផ្គង់របស់សហរដ្ឋអាមេរិកចំនួន៥គ្រាប់ បណ្តាលឲ្យមនុស្សយ៉ាងហោចណាស់បីនាក់ស្លាប់ក្នុងនោះមានកុមារពីរនាក់ និងរងរបួសជាង ១០០ នាក់។

ក្រសួងការពារជាតិរុស្ស៊ី និយាយថា មីស៊ីលចំនួនបួនគ្រប់នៃប្រព័ន្ធមីស៊ីលតាកទិករបស់កងទ័ព ដែលផ្តល់ដោយសហរដ្ឋអាមេរិក បានបំពាក់ដោយក្បាលគ្រាប់ចង្កោម ត្រូវបានបាញ់ទម្លាក់ដោយប្រព័ន្ធការពារដែនអាកាស ហើយគ្រាប់ទី៦ បានផ្ទុះនៅលើអាកាស។

ក្រសួងបាននិយាយថា សហរដ្ឋអាមេរិកដែលបានផ្គត់ផ្គង់មីស៊ីលតាកទិក ឱ្យទៅអ៊ុយក្រែន ជាអ្នកទទួលខុសត្រូវចម្បងចំពោះការវាយប្រហារនេះ។

អាជ្ញាធរដែលលើកបន្តុបដោយរុស្ស៊ី បាននិយាយថា បំណែកមីស៊ីល បានធ្លាក់នៅជិតឆ្នេរមួយកន្លែងនៅភាគខាងជើងទីក្រុង Sevastopol ជាកន្លែងដែលអ្នកស្រុកកំពុងសម្រាកវិស្សមកាល។

លោក រ៉ាហ្សវ៉ូហ្សាយ៉េវ(Razvozhayev) អភិបាលក្រុង Sevastopol ដែលលើកបន្តុបដោយរុស្ស៊ី បាននិយាយនៅលើបណ្តាញ Telegram ថា មនុស្សជាងមួយរយនាក់បានរងរបួស ក្នុងការវាយប្រហារនេះ។

រុស្ស៊ី បានបញ្ចូលឧបទ្វីបគ្រីម៉េក្នុងឆ្នាំ២០១៤។ ឧបទ្វីបនេះ ស្ថិតនៅក្រោមការគ្រប់គ្រងរបស់ទីក្រុងមូស្គូ តាំងពីពេលនោះមក ហើយរុស្ស៊ី បានចាត់ទុកតំបន់នេះជាផ្នែកមួយរបស់ប្រទេសរុស្ស៊ី ទោះបីជាភាគច្រើននៃពិភពលោក ចាត់ទុកវាជាផ្នែកមួយរបស់អ៊ុយក្រែនក៏ដោយ។

អ្នកនាំពាក្យក្រសួងការបរទេសលោកស្រី Maria Zakharova បាននិយាយថា ប្រទេសរុស្ស៊ី មានបំណងស្វែងរកការឆ្លើយតបពីអង្គការអន្តរជាតិ ចំពោះការបាញ់ផ្លោងរបស់អ៊ុយក្រែនលើទីក្រុង Sevastopol ។ សហរដ្ឋអាមេរិក បាននឹងកំពុងផ្គត់ផ្គង់ទៅឲ្យកងទ័ពអ៊ុយក្រែននូវមីស៊ីលតាកទិក រយៈចម្ងាយឆ្ងាយ ដែលអាចបាញ់បានរយៈចម្ងាយ៣០០ គីឡូម៉ែត្រ ចាប់តាំងពីដើមឆ្នាំនេះ។