បាត់ដំបង៖ ឯកឧត្តម សុខ លូ អភិបាលខេត្តបាត់ដំបង បានអញ្ជើញដឹកនាំមន្រ្តីរាជការ កងកម្លាំង អាជ្ញាធរមូលដ្ឋាន ប្រជាពលរដ្ឋ និងយុវជន រៀបចំពិធីជីករណ្ដៅនៅក្នុងក្រុងបាត់ដំបង ដើម្បីត្រៀមបើកយុទ្ធនាការផ្ទះមួយខ្នងដាំដើមឈើមួយដើម ខណៈយុទ្ធនាការនេះគ្រោងធ្វើឡើងនៅខែកក្កដា ឆ្នាំ២០២៤។
ក្នុងពិធីជីករណ្ដៅដែលធ្វើឡើងនៅមុខផ្សារណាត់ក្រុងបាត់ដំបង នាថ្ងៃទី២៣ ខែមិថុនា ឆ្នាំ២០២៤ ឯកឧត្តម សុខ លូ បានគូសបញ្ជាក់ថា យុទ្ធនាការនេះនឹងចាប់ផ្តើមព្រមៗគ្នានៅថ្ងៃទី១១ ខែកក្កដា ឆ្នាំ២០២៤ នៅក្នុងក្រុងបាត់ដំបង និងបណ្តាទីប្រជុំជនស្រុកទាំង១៣ នៃខេត្តបាត់ដំបង។ សម្រាប់ក្នុងក្រុងបាត់ដំបងត្រៀមដាំដើមឈើប្រមាណ២៥០០០ដើម។
តាមរយៈយុទ្ធនាការផ្ទះមួយខ្នងដាំដើមឈើមួយដើម ឯកឧត្តម សុខ លូ បង្ហាញក្ដីសង្ឃឹមយ៉ាងមុតមាំថា ក្រុងបាត់ដំបងនឹងមានសម្រស់កាន់តែស្រស់ស្អាត បន្ទាប់ពីដើមឈើដែលត្រូវដាំនោះលូតលាស់ ធ្វើឱ្យក្រុងបាត់ដំបង ក្លាយជាទីក្រុងបៃតង ទាក់ទាញភ្ញៀវទេសចរជាតិ និងអន្តរជាតិមកទស្សនាខេត្តបាត់ដំបងកាន់តែច្រើនឡើងថែមទៀត។
ឯកឧត្តម សុខ លូ អំពាវនាវដល់អង្គការ និងសប្បុរសជននានា មេត្តាចូលរួមជួយផ្តល់ដើមឈើ ដើមផ្កា ដើម្បីចូលរួមក្នុងយុទ្ធនាការ ផ្ទះមួយខ្នង ដើមឈើមួយដើម នៅក្នុងខេត្តបាត់ដំបងបានទទួលលទ្ធផលជាផ្លែផ្កាទុកជាប្រយោជន៍ដល់មនុស្សជាតិគ្រប់ៗគ្នាជំនាន់នេះ និងអ្នកជំនាន់ក្រោយ។
ជាមួយគ្នានោះ លោក កត បូរ៉ាន ប្រធានមន្ទីរបរិស្ថានខេត្តបាត់ដំបង បានគូសបញ្ជាក់ថា មន្ទីរបានត្រៀមកូនឈើប្រមាណ២០ ០០០ម៉ឺនដើម សម្រាប់ចែកជូនក្នុងយុទ្ធនាការផ្ទះមួយខ្នងដាំដើមឈើមួយដើម និងបានត្រៀមកូនឈើមួយចំនួនទៀតសម្រាប់ដាំជួស។
លោក កត បូរ៉ាន ថ្លែងឱ្យដឹងបន្ថែមថា សម្រាប់ឆ្នាំ២០២៤នេះ មន្ទីរបរិស្ថានបានត្រៀមកូនឈើចម្រុះប្រមាណ៤៥ ០០០ដើមសម្រាប់ចែកជូនដល់ប្រជាពលរដ្ឋយកទៅដាំដោយឥតគិតថ្លៃ។ ការចែកជូនកូនឈើដល់ប្រជាពលរដ្ឋយកទៅដាំនឹងត្រូវធ្វើឡើងនៅពាក់កណ្ដាលខែកក្កដាខាងមុខ។ សម្រាប់ប្រជាពលរដ្ឋ មន្ទីរ អង្គភាព ស្ថាប័ននានាដែលត្រូវការកូនឈើសូមមកដាក់ពាក្យស្នើសុំនៅមន្ទីរបរិស្ថាន៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
