មន្ត្រីយោធាជាន់ខ្ពស់របស់អាមេរិក កាលពីថ្ងៃអាទិត្យ (ទី២៣ ខែមិថុនា) បាននិយាយថា កិច្ចព្រមព្រៀងការពារគ្នាទៅវិញទៅមករបស់ប្រធានាធិបតីរុស្ស៊ី លោក Vladimir Putin ជាមួយកូរ៉េខាងជើងមានសក្តានុពល ក្នុងការបង្កើតឲ្យមានការរង្កៀសចិត្តគ្នាជាមួយប្រទេសចិន ដែលជាសម្ព័ន្ធមិត្តដ៏សំខាន់របស់រដ្ឋឯកោមួយនេះជាយូរមកហើយ។

ក្នុងអំឡុងពេលធ្វើដំណើរនៅក្រៅប្រទេស ប្រធានអគ្គសេនាធិការចម្រុះ គឺឧត្តមសេនីយ៍ទ័ពអាកាស លោក C.Q. Brown បានប្រាប់អ្នកសារព័ត៌មានថា៖ «យើងមានអ្នកផ្សេងទៀតដែលឥឡូវនេះបានធ្វើដំណើរចូលទៅក្នុងរូបភាពនោះជាបណ្ដើរៗ ដូច្នេះ វាអាចជំរុញឲ្យមានការរង្កៀសចិត្តតិចតួចបន្ថែមទៀត រវាង (ចិន) និងរុស្ស៊ី។ ដូច្នេះ វាគួរឲ្យចាប់អារម្មណ៍ក្នុងរង់ចាំមើលថា តើប្រទេសទាំង៣ នេះ បញ្ចប់ទៅយ៉ាងដូចម្តេច?»។

បណ្ដាអ្នកវិភាគបានលើកឡើងថា កិច្ចព្រមព្រៀងដែលបានចុះហត្ថលេខាកាលពីថ្ងៃទី១៩ ខែមិថុនា អាចកាត់បន្ថយឥទ្ធិពលរបស់ទីក្រុងប៉េកាំងលើប្រទេសជិតខាងទាំង២ ហើយអស្ថិរភាពដែលកើនឡើងណាមួយ អាចជះផលអវិជ្ជមានដល់មហិច្ឆតាសេដ្ឋកិច្ច និងយុទ្ធសាស្ត្រសកលរបស់ចិន។

គួរបញ្ជាក់ថា កាលពីថ្ងៃទី២០ ខែមិថុនា លោកពូទីន បានព្រលយពាក្យសម្ដីថា រុស្ស៊ីអាចនឹងផ្គត់ផ្គង់សព្វាវុធដល់កូរ៉េខាងជើង ជាអ្វីដែលលោកបានលើកឡើងថា ជាការឆ្លើយតបែបកញ្ចក់ឆ្លុះបញ្ចាំង ចំពោះការផ្ដល់អាវុធរបស់លោកខាងលិចដល់ប្រទេសអ៊ុយក្រែន៕