នៅរសៀលថ្ងៃទី២៣ ខែមិថុនា ឆ្នាំ២០២៤ ឯកឧត្តម នាយឧត្តមសេនីយ៍ កិត្តិសង្គហ បណ្ឌិត គន់ គីម ទេសរដ្ឋមន្ត្រី អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា បានអញ្ជើញ​ជា​អធិបតីភាព ក្នុងពិធីបញ្ចុះបឋមសិលាសាងសង់អគាររដ្ឋបាល​សមាគមអតីតយុទ្ធជនខេត្ត និង​ពិធីអបអរសាទរខួបលើកទី១៧ ទិវាអតីតយុទ្ធជនកម្ពុជា ២១មិថុនា ឆ្នាំ២០២៤​ ស្ថិតក្នុងភូមិភារកិច្ច សង្កាត់ប៉ាលហាល ក្រុងព្រះវិហារ ខេត្តព្រះវិហារ។

ពិធីនេះ ក៏មានការអញ្ជើញចូលរួមពីសំណាក់ ឯកឧត្តម ប្រាក់ សុវណ្ណ ប្រធានក្រុមប្រឹក្សាខេត្ត ឯកឧត្តម គីម រិទ្ធី អភិបាលខេត្ត និងជាប្រធានកិត្តិយសសមាគមអតីតយុទ្ធជនកម្ពុជាខេត្តព្រះវិហារ ព្រមទាំង ឯកឧត្តមប្រធាន អនុប្រធានសមាគមអតីតយុទ្ធជន លោក លោកស្រីប្រធានមន្ទីរអង្គភាព​ជុំវិញខេត្ត និងអតីតយុទ្ធជនជាច្រើនរូបទៀត។

ឯកឧត្តម គន់ គីម បានថ្លៃងថា នៅថ្ងៃទី២១ ខែមិថុនា ឆ្នាំ២០២៤ គឺជាទិវាប្រវត្តិសាស្ត្រប្រកប​ដោយមោទនភាពបំផុតដែលបងប្អូនអតីតយុទ្ធជន និងប្រជាពលរដ្ឋនៅទូទាំងព្រះរាជាណាចក្រ​កម្ពុជា បានប្រារព្ធខួបលើកទី១៧ ទិវាអតីតយុទ្ធជនកម្ពុជា ដើម្បីរំឮកដល់គំរូវីរភាពដ៏មោះមុត និងគុណបំណាច់ដ៏ធំធេងរបស់វីរយុទ្ធជន យុទ្ធនារី នៃកងកម្លាំងប្រដាប់អាវុធ និងប្រជាពលរដ្ឋ​គ្រប់ស្រទាប់ ដែលបានធ្វើពលិកម្មយ៉ាងអង់អាចក្លាហាន​ បូជាសាច់ស្រស់ ឈាមស្រស់ ដើម្បីបុព្វហេតុជាតិមាតុភូមិជាទីស្នេហា។

ឯកឧត្តម បានបន្ដថា ​ពលិកម្មប្រកបដោយស្មារតីស្នេហាជាតិរបស់វីរអតីតយុទ្ធជន ​យុទ្ធនារី និង​ប្រជាពលរដ្ឋយើងនៅគ្រប់ដំណាក់កាលនៃប្រវត្តិសាស្ត្រ បានរួមចំណែកយ៉ាងសំខាន់​ក្នុងកិច្ចការពារ​បូរណភាពទឹកដី ការកសាងសុខសន្តិភាព ​និងស្ថិរភាពសង្គមសម្រាប់ព្រះរាជាណាចក្រកម្ពុជា សំដៅធានាឱ្យមានការអភិវឌ្ឍសេដ្ឋកិច្ច និងសង្គម ​ដើម្បីជាឧត្តមប្រយោជន៍ជូនជាតិមាតុភូមិ និងប្រជាជនកម្ពុជា។ ​ជាមួយនេះ ចាប់តាំងពីក្រោយថ្ងៃរំដោះ ៧មករា ១៩៧៩ រាជរដ្ឋាភិបាលបាន​យកចិត្ត​ទុកដាក់ខ្ពស់ ក្នុងការអនុវត្តគោលនយោបាយនានា​ ដើម្បីលើកកម្ពស់សុខុ-មាលភាព និងជីវភាពរស់នៅ​របស់បងប្អូនអតីតយុទ្ធជនឱ្យបានល្អប្រសើរជាបន្តបន្ទាប់។

ក្នុងឱកាសខួបលើកទី១៧ នៃទិវាអតីតយុទ្ធជនកម្ពុជានេះ ឯកឧត្តមទេសរដ្ឋមន្ដ្រី ក៏បាន អំពាវនាវ​ដល់ បងប្អូនអតីតយុទ្ធជនកម្ពុជា សូមបន្តរក្សាស្មារតីវីរភាពដ៏ឧត្តុង្គឧត្តម និងសេចក្តីថ្លៃថ្នូរ ជា​ពលរដ្ឋឆ្នើមរបស់ជាតិមាតុភូមិ​ ដើម្បីបន្តធ្វើជាគំរូល្អក្នុងសង្គមជាតិ។

ឯកឧត្តមក៏បានផ្ដាំផ្ញើដល់មន្ទីរ អង្គភាព និងអាជ្ញាធរដែនដីគ្រប់លំដាប់ថ្នាក់ ត្រូវចូលរួមក្នុងការជួយ​ឧបត្ថម្ភគាំទ្រ​ដល់អតីតយុទ្ធជន និងគ្រួសារអតីតយុទ្ធជនដែលកំពុងជួបប្រទះការលំបាក និងចុះសួរ​សុខទុក្ខ បងប្អូនអតីតយុទ្ធជនតាមមូលដ្ឋាន ​និងយុទ្ធជន យុទ្ធនារី ជាពិសេសយុទ្ធជន យុទ្ធនារីក្នុង​អង្គភាពកងកម្លាំង ប្រដាប់អាវុធ សម្ព័ន្ធមេត្រីភាព​ យុទ្ធជន យុទ្ធនារី ដែលកំពុងសម្រាកព្យាបាល​នៅតាមមន្ទីរពេទ្យ ​និងជនពិការ នៅតាមមណ្ឌលយោធិនពិការ ដើម្បីលើកទឹកចិត្ត និងផ្សារភ្ជាប់​មនោសញ្ចេតនា​ជាមួយអតីតយុទ្ធជន ​និងយុទ្ធជន យុទ្ធនារី។ ​លើសពីនេះត្រូវបន្តអនុវត្តឱ្យបានល្អ និងមានប្រសិទ្ធភាព​នូវការផ្តល់សេវាគាំពារសុខុមាលភាព, ការបើកផ្តល់របបសន្តិសុខសង្គម និង​ត្រូវខិតខំជំរុញការអនុវត្តគម្រោងសាងសង់ផ្ទះជូនអតីតយុទ្ធជន និងគ្រួសារអតីតយុទ្ធ៕