ក្រុមអ្នកព្យាករអាកាសធាតុបាននិយាយថា ប្រជាជនអាមេរិក ចាប់ពីទីក្រុងញូវយ៉ក (New York) រហូតដល់ទីក្រុងវ៉ាស៊ីនតោន (Washington) ទីបំផុតអាចទទួលបានការបន្ធូរបន្ថយខ្លះកាលពីថ្ងៃចន្ទ (២៤ មិថុនា) ពីរលកកម្ដៅដ៏ខ្លាំងក្លាដែលបានវាយប្រហារកាលពីសប្តាហ៍មុន ទោះបីជាសីតុណ្ហភាពដ៏ក្តៅគគុកនៅតែគំរាមកំហែងដល់ភាគអាគ្នេយ៍ និងភាគនិរតីក៏ដោយ។

សេវាអាកាសធាតុជាតិ (NWS) បាននិយាយថា រលកកម្ដៅទំនងជានឹងឡើងដល់ចំណុចខ្ពស់បំផុតនៅភាគនិរតី តំបន់កណ្តាលភាគខាងត្បូង និងវាលទំនាបនៅដើមសប្តាហ៍នេះ ជាមួយនឹងអំណានសន្ទស្សន៍កម្ដៅលើសពី ៤៣ អង្សាសេនៅកន្លែងមួយចំនួន។

ទន្ទឹមនឹងនេះ តំបន់កណ្តាលនៃភាគខាងលិចមានព្យុះផ្គររន្ទះខ្លាំងកាលពីថ្ងៃចន្ទ ខណៈដែលភាគនិរតីអាចទទួលបានលក្ខខណ្ឌដូចខ្យល់មូសុង ដោយសារតែសំណើមដែលមកពីសំណល់នៃព្យុះស៊ីក្លូនត្រូពិច អាល់ប៊ឺតតូ (Alberto) ដែលអាចបង្កឱ្យមានទឹកជំនន់ដ៏គំហុក។

លោក រីច បាន (Rich Bann) អ្នកជំនាញឧតុនិយមនៅមជ្ឈមណ្ឌលព្យាករណ៍អាកាសធាតុរបស់ទីភ្នាក់ងារ NWS បាននិយាយថា «ជំនួសឱ្យការនិយាយថាត្រជាក់ជាងមុន យើងអាចប្រាប់បានថាមិនសូវក្តៅខ្លាំង ព្រោះលក្ខខណ្ឌអាកាសធាតុខ្យល់មូសុងនេះអាចជួយឱ្យផ្នែកខ្លះនៃភាគនិរតីចុះត្រជាក់បន្តិច»។

ទោះបីជាថ្ងៃចុងក្រោយនៃរលកកម្ដៅនៅក្នុងច្រករបៀង ញ៉ូវយក-វ៉ាស៊ីនតោន ត្រូវបានព្យាករកាលពីថ្ងៃអាទិត្យក៏ដោយ ការណែនាំអំពីកម្ដៅនៅតែមានប្រសិទ្ធភាពនៅទូទាំងប្រទេស។ មនុស្សជាង ១០០ លាននាក់នៅទូទាំងសហរដ្ឋអាមេរិក បានស្ថិតនៅក្រោមការព្រមានអំពីកម្ដៅកាលពីថ្ងៃអាទិត្យ នៅពេលដែលសីតុណ្ហភាពឡើងលើសពី ៣៨ អង្សាសេ នៅកន្លែងជាច្រើន៕