ការវាយប្រហារប្រឆាំងជនជាតិមូស្លីម នៅអាល្លឺម៉ង់ មានការកើនឡើងខ្លាំង បន្ទាប់ពីជម្លោះចុងក្រោយបង្អស់រវាងអ៊ីស្រាអែល និងប៉ាឡេស្ទីន បានផ្ទុះឡើង។ ឧប្បត្តិហេតុទាំងនោះរួមមាន ការប៉ុនប៉ងដុតដោយចេតនានៅលើវិហារឥស្លាមមួយក្នុងទីក្រុង បូហ៊ុម (Bochum) ទ្វាររបស់គ្រួសារមូស្លីមនៅរដ្ឋ ហ៊្សាកស៊ិន (Saxony) ដែលត្រូវបានអ្នកជិតខាងបាញ់ដោយកាំភ្លើង និងស្ត្រីម្នាក់ត្រូវបានរុញចូលផ្លូវរថភ្លើងក្នុងក្រុង ប៊ែរឡាំង បន្ទាប់ពីត្រូវសួរថាតើនាងជាសមាជិកក្រុមហាម៉ាស ឬទេ។

ទាំងនេះគឺជាកំណត់ត្រាមួយចំនួនក្នុងចំណោមឧប្បត្តិហេតុប្រឆាំងមូស្លីមចំនួន ១.៩២៦ ករណីដែលបានចុះបញ្ជីនៅអាល្លឺម៉ង់ កាលពីឆ្នាំមុន ដោយបណ្តាញ ឃ្លែម (CLAIM) របស់អង្គការក្រៅរដ្ឋាភិបាលដែលឃ្លាំមើលការភ័យខ្លាចប្រឆាំងសាសនាអ៊ីស្លាម និងភាពស្អប់ខ្ពើមប្រឆាំងជនជាតិមូស្លីម។ នោះជាកំណើន ១១៤ ភាគរយនៅឆ្នាំ២០២៣ ពោលគឺឡើងទ្វេដង ជាពិសេសបន្ទាប់ពីការវាយប្រហារកាលពីថ្ងៃទី០៧ ខែតុលា។

លោកស្រី រីម៉ា ហាណាណូ (Rima Hanano) បានប្រាប់សន្និសីទសារព័ត៌មានទីក្រុងប៊ែរឡាំង កាលពីថ្ងៃចន្ទ (២៤ មិថុនា) ដើម្បីបង្ហាញរបាយការណ៍នេះថា អាជ្ញាធរមិនបានយកចិត្តទុកដាក់គ្រប់គ្រាន់ចំពោះហេតុការណ៍នេះទេ ហើយថែមទាំងបានបដិសេធថាគ្មានវត្តមានឧប្បត្តិហេតុទាំងនោះទៀតផង ខណៈគណបក្សធំៗបានកាន់កាប់គោលនយោបាយស្ដាំនិយមជ្រុល និងគណបក្សប្រឆាំងអ៊ីស្លាម ទទួលបានប្រជាប្រិយភាព។

ការវាយប្រហារលើបុគ្គល ភាគច្រើនជាការរំលោភបំពានដោយពាក្យសម្ដី និងដាក់គោលដៅលើស្ត្រី ហើយក៏មានការប៉ុនប៉ងឃាតកម្មចំនួនបួនករណីផងដែរ។ ចំនួនប្រជាជនមូស្លីម នៅអាល្លឺម៉ង់ បាននិងកំពុងកើនឡើងយ៉ាងឆាប់រហ័ស ជាពិសេសចាប់តាំងពីលំហូរនៃជនអន្តោប្រវេសន៍ក្នុងឆ្នាំ២០១៥-២០១៦ ដែលមានចំនួនសរុប ៥,៥ លាននាក់ ឬ ៦,៦ ភាគរយនៃចំនួនប្រជាជនសរុប៕