អ្នកនាំពាក្យមន្ទីរបញ្ចកោណលោក Patrick Ryder បាននិយាយថា អាជ្ញាធរអាមេរិក មិនចង់ឲ្យជនស៊ីវិលស្លាប់ទេ ហើយនឹងពិភាក្សាអំពីបញ្ហានេះ ជាមួយទីក្រុងគីវ ដោយបានអត្ថាធិប្បាយលើសេចក្តីថ្លែងការណ៍របស់ភាគីរុស្ស៊ីអំពីការវាយប្រហារភេរវកម្ម នៅទីក្រុង Sevastopol។

លោកបានឆ្លើយតបនឹងសំណួររបស់អ្នកសារព័ត៌មានអំពីការវាយប្រហារភេរវកម្ម នៅទីក្រុង Sevastopolថា៖«ទីបំផុត ខ្ញុំចង់បញ្ជូនអ្នកទៅកាន់អ៊ុយក្រែន ដើម្បីនិយាយអំពីប្រតិបត្តិការរបស់ពួកគេ។ អ្នកដឹងទេ ពួកគេ ធ្វើការសម្រេចចិត្តដោយខ្លួនឯង នៅពេលនិយាយអំពីប្រតិបត្តិការ និងការកំណត់គោលដៅ។ យើងមិនមានព័ត៌មានណាមួយ ដើម្បីបញ្ជាក់ថា តើជនស៊ីវិល ត្រូវបានសម្លាប់ ឬអត់នោះទេ»។ លោក Ryder បាននិយាយថា៖«ប្រាកដណាស់ អ្នកពិតជាដឹង នោះជាគឺអ្វីដែលយើងនឹងនិយាយជាមួយនឹងប្រជាជនអ៊ុយក្រែន។ យើងបានដឹងយ៉ាងច្បាស់អំពីបញ្ហានោះ។ អ្នកដឹងទេថា យើងពិតជាមិនចង់ឃើញជនស៊ីវិលស្លាប់ ឬរងរបួសនោះទេ។

អ្នកនាំពាក្យមន្ទីរបញ្ចកោណ បានបន្ថែមថា៖«ប្រសិនបើពួកគេ (ប្រជាជនរុស្ស៊ី) មានការព្រួយបារម្ភអំពីការស្លាប់ និងរបួសក្នុងចំណោមកងកម្លាំងរបស់ពួកគេ នោះពួកគេ គួរតែបញ្ឈប់សង្គ្រាមនេះភ្លាមៗ ហើយប្រគល់ទឹកដីអធិបតេយ្យភាពរបស់អ៊ុយក្រែនវិញ គឺជៀសវាងការបញ្ជូនកងកម្លាំងរបស់ពួកគេដោយមិនចាំបាច់ ចូលទៅក្នុងសង្គ្រាមនេះ»។ នៅពេលសួរថាតើសហរដ្ឋអាមេរិក បានផ្តល់ព័ត៌មានចារកម្មដល់យោធាអ៊ុយក្រែន ដើម្បីជ្រើសរើសគោលដៅ មុនការវាយប្រហារឬអត់នោះ លោក Ryder បាននិយាយថា៖«ខ្ញុំចង់ឲ្យអ្នកទៅសួរពួកគេអំពីកិច្ចប្រតិបត្តិការណាមួយរបស់ពួកគេ»។

កាលពីថ្ងៃទី ២៣ ខែមិថុនា កងទ័ពអ៊ុយក្រែន បានវាយប្រហារហេដ្ឋារចនាសម្ព័ន្ធស៊ីវិល នៅក្នុងទីក្រុង Sevastopol ជាមួយនឹងមីស៊ីលតាក់ទិកកងទ័ព (ATACMS) ដែលបំពាក់ដោយគ្រាប់បែកចង្កោម។          មីស៊ីលចំនួន ៤គ្រាប់ ត្រូវបានបាញ់ទម្លាក់ ខណៈដែលមីស៊ីលមួយគ្រាប់ទៀត បានផ្ទុះនៅពីខាងលើទីក្រុងនេះ។ ដូចដែលអភិបាលក្រុង Sevastopol លោក Razvozhayev បាននិយាយថា ការវាយប្រហារដោយមីស៊ីល បានសម្លាប់ជនស៊ីវិល ៤នាក់ ក្នុងនោះមានកុមារពីរនាក់ និង ជាង១៥០នាក់ផ្សេងទៀត បានរងរបួស។