យោធាអ៊ុយក្រែន បាននិយាយថា ប្រទេសរុស្ស៊ី កំពុងដកកងកម្លាំងរបស់ខ្លួនមួយចំនួនចេញពីទីក្រុង Vovchansk បន្ទាប់ពី «ជាប់គាំង» នៅក្នុងទីក្រុងខាគីវភាគឦសានដែលឥឡូវនេះ ត្រូវបានបំផ្លាញស្ទើរតែស្រុងហើយនោះ។

អ្នកនាំពាក្យក្រុមយោធា Khortytsia របស់អ៊ុយក្រែន បាននិយាយថា កងកម្លាំងរុស្ស៊ី ក៏បាននិងកំពុងដកចេញពីភូមិព្រំដែន Lyptsi និង Tykhe ដែរ។

លោក Nazar Voloshyn បាននិយាយថា៖ នេះបង្ហាញថា សត្រូវបានផ្អាកអរិភាពសកម្មរបស់ខ្លួន នៅក្នុងតំបន់នោះ ខណៈដែលពួកគេ មិនបានធ្វើប្រតិបត្តិការណាមួយ នៅទីនោះ ក្នុងរយៈពេលមួយថ្ងៃកន្លងមក និងនៅពេលព្រឹក»។

ប្រទេសអ៊ុយក្រែន បានដាក់ពង្រាយទាហានរាប់ពាន់នាក់ ឲ្យឈរជើងនៅជិតព្រំដែន បន្ទាប់ពីរុស្ស៊ី បានបើកការវាយប្រហារឆ្លងព្រំដែនដ៏គួរឲ្យភ្ញាក់ផ្អើលមួយ នៅដើមខែឧសភា ដែលបានរុលចូលចម្ងាយ ៦      ម៉ាយ ទៅក្នុងទឹកដីអ៊ុយក្រែន។

កាលពីដើមខែនេះ ឧត្តមសេនីយ៍ឯក Oleksandr Syrsky មេបញ្ជាការយោធាអ៊ុយក្រែន បាននិយាយថា កងកម្លាំងរុស្ស៊ី បានជាប់គាំងក្នុងការប្រយុទ្ធនៅក្នុងទីVovchansk មានចម្ងាយ ៤០ម៉ាយពីទីក្រុងខាគីវ។

វិទ្យាស្ថានសិក្សាសង្គ្រាមដែលមានមូលដ្ឋាននៅសហរដ្ឋអាមេរិក (ISW) ជឿជាក់ថា រុស្ស៊ី បានបញ្ជាឲ្យធ្វើការវាយប្រហារឆ្លងព្រំដែន ដើម្បីបណ្តេញទាហានអ៊ុយក្រែនឲ្យចេញទៅឆ្ងាយពីសមរភូមិជួរមុខ នៅក្នុងតំបន់ Donbas ជាជាងដណ្តើមទីក្រុងខាគីវជាក់ស្តែង។