ទីភ្នាក់ងារឃ្លាំមើលភាពអត់ឃ្លានពិភពលោកបាននិយាយកាលពីថ្ងៃអង្គារ (២៥ មិថុនា) ថា តំបន់ហ្កាហ្សា នៅតែមានហានិភ័យខ្ពស់នៃគ្រោះទុរ្ភិក្ស ដោយសារសង្រ្គាមរវាងអ៊ីស្រាអែល និងក្រុមហាម៉ាស នៅតែបន្ត ហើយលទ្ធភាពទទួលបានជំនួយត្រូវបានរឹតបន្តឹង ទោះបីជាការផ្តល់គ្រឿងផ្គត់ផ្គង់បានជួយកាត់បន្ថយការរីករាលដាលនៃភាពស្រេកឃ្លានខ្លាំងនៅក្នុងតំបន់ភាគខាងជើងក៏ដោយ។

មនុស្សជាង ៤៩៥.០០០ នាក់នៅទូទាំងតំបន់ហ្កាហ្សាស្ទ្រីប កំពុងប្រឈមមុខនឹងកម្រិតអសន្តិសុខស្បៀងយ៉ាងធ្ងន់ធ្ងរបំផុត ឬ «កម្រិតមហន្តរាយ» នេះបើយោងតាមការធ្វើបច្ចុប្បន្នភាពពីអង្គភាពការដាក់បញ្ចូលដំណាក់កាលសន្តិសុខស្បៀង (IPC) ។

នោះគឺធ្លាក់ចុះពីការព្យាករចំនួន ១,១ លាននាក់ ក្នុងការធ្វើបច្ចុប្បន្នភាពនៅកាលពី ៣ ខែមុន ប៉ុន្តែតួលេខអ្នកអត់ឃ្លាននៅតែមានច្រើនជាងមួយភាគប្រាំនៃចំនួនប្រជាជនហ្កាហ្សា។ ស្ថិតក្រោមអសន្តិសុខស្បៀង «ដ៏មហន្តរាយ» ក្រុមគ្រួសារទទួលរងកង្វះខាតអាហារយ៉ាងខ្លាំង ដែលនាំឱ្យកុមារតូចមានកង្វះអាហារូបត្ថម្ភធ្ងន់ធ្ងរ ហានិភ័យនៃភាពអត់ឃ្លានដែលជិតមកដល់ និងការស្លាប់។

ការវាយតម្លៃរបស់ទីភ្នាក់ងារ IPC ចេញផ្សាយកាលពីថ្ងៃអង្គារមួយនេះបាននិយាយថា ដើម្បីទិញអាហារ ជាងពាក់កណ្តាលនៃក្រុមគ្រួសារពលរដ្ឋហ្កាហ្សា ដែលបានស្ទង់មតិត្រូវលក់សម្លៀកបំពាក់ ហើយមួយភាគបីបានប្រមូល និងលក់សំរាម ហើយជាង ២០ ភាគរយរាយការណ៍ថាបានធ្វើដំណើរទាំងថ្ងៃទាំងយប់ដោយមិនបានបរិភោគ។ សរុបមក ប្រហែល ៩៦ ភាគរយនៃចំនួនប្រជាជនប្រឈមមុខនឹងកម្រិតអសន្តិសុខស្បៀងធ្ងន់ធ្ងរក្នុងរយៈពេលនេះរហូតដល់ខែកញ្ញា៕