ភ្នំពេញ ៖ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានបន្តដឹកនាំវគ្គបណ្តុះបណ្តាលស្តីពី «ភាពជាអ្នកដឹកនាំ និងនវានុវត្តន៍» សម្រាប់មន្រ្តីរាជការក្រោមឱវាទក្រសួងសុខាភិបាល តាមប្រព័ន្ធវីដេអូសន្និសីទ ដែលមានសមាសភាពចូលរួមសរុបចំនួន ២៤៧១នាក់, នារសៀលថ្ងៃទី២៥ ខែមិថុនា ឆ្នាំ២០២៤។

​ការរៀបចំវគ្គបណ្តុះបណ្តាលភាពជាអ្នកដឹកនាំ គឺជាអាទិភាពមួយក្នុងចំណោមអាទិភាពចាំបាច់នៃសុខាភិបាល សម្រាប់ការពង្រឹងស្ថាប័ន ក្នុងការគាំទ្រកំណែទម្រង់ ការអនុវត្តយុទ្ធសាស្រ្តបញ្ចកោណ របស់រាជរដ្ឋាភិបាលសម្រាប់នីតិកាលទី៧ នៃរដ្ឋសភា។ ក្នុងសប្តាហ៍នេះ ខ្លឹមសារបស់វគ្គ ផ្តោតលើភាពជាអ្នកដឹកនាំដែលចេញពីឥទ្ធិពលបុគ្គលដឹកនាំ ដែលជាការដឹកនាំមួយសំដៅផ្តល់ផលជាវិជ្ជមាន ដល់ការគ្រប់គ្រង និងបម្រើសេវាសុខភាពជូនប្រជាពលរដ្ឋ ប្រកបដោយគុណភាព និងនិរន្តរភាព។ 

ឯកឧត្តមសាស្រ្តាចារ្យរដ្ឋមន្រ្តី បានលើកយកឧបករណ៍ Johari Window មកបង្ហាញ ដែលឧបករណ៍នេះ បែងចែកលក្ខណៈសម្បត្តិរបស់អ្នកដឹកនាំដោយប្រើប្រាស់វិជ្ជមាត្រ២ គឺការដឹងពីខ្លួនឯង និងការស្គាល់ពីអ្នកដ៏ទៃ។ ជារួម Johari Window ចែកអ្នកដឹកនាំជា ៤ ប្រភេទ រួមមាន៖ Public Self, Blind Self, Private self និង Unknown self។ ក្នុងទ្រឹស្តីនេះ អ្នកដឹកនាំដែលបង្កើតបានឥទ្ធិពលជាងគេ គឺជាអ្នកដឹកនាំដែលមានលក្ខណៈ Public self។ អ្នកដឹកនាំ Public Self ជាអ្នកដឹកនាំដែលបានស្គាល់ចំនុចខ្លំាង និងចំណុចខ្សោយរបស់ខ្លួនឯងច្បាស់ ហើយក៏បង្ហាញចំនុចទាំងនេះអោយអ្នកនៅជុំវិញបានដឹងផងដែរ។ ហើយការធ្វើបែបនេះនឹងធ្វើអោយអ្នកដឹកនាំនោះអាចទាក់ទាញទំនុកចិត្ត និងការចូលរួមពីបុគ្គលិកបានច្រើន។

សូមបញ្ជាក់ផងដែរថា វគ្គបណ្តុះបណ្តាលនេះត្រូវបានរៀបចំឡើងនៅរៀងរាល់ថ្ងៃអង្គារ ដែលចាប់ពីសប្តាហ៍នេះមានវត្តមាន ថ្នាក់ដឹកនាំអង្គភាពថ្នាក់ជាតិ ចាប់ពីអនុប្រធានការិយាល័យថ្នាក់កណ្តាល រហូតដល់រដ្ឋលេខាធិការក្រសួងសុខាភិបាល និងអង្គភាពថ្នាក់ក្រោមជាតិ ចាប់ពីប្រធានមណ្ឌលសុខភាព រហូតដល់ប្រធានមន្ទីរសុខាភិបាលរាជធានី-ខេត្ត៕

អត្ថបទ៖ រដ្ឋា