អ្នកតាមដានភាពអត់ឃ្លានពិភពលោកនិយាយកាលពីថ្ងៃអង្គារថា ការគំរាមកំហែងពីគ្រោះទុរ្ភិក្សនៅតែមានទូទាំងតំបន់ហ្កហ្សាស្រ្ទីប ពេលដែលសង្រ្គាមរវាងអ៊ីស្រាអែល និងក្រុមហាម៉ាស់នៅតែបន្ត ហើយការចូលដល់ជំនួយមនុស្សធម៌ បន្តរឹត្បិតដដែល បើទោះបីជាជំនួយមួយចំនួនទៀត បានចូលទៅដល់តំបន់ភាគខាងជើងហ្កាហ្សាក៏ដោយ ។

លោក Máximo Torero គឺជាប្រធានសេដ្ឋវិទូនៃអង្គការស្បៀងអាហារ និងកសិកម្ម(FAO)និយាយថា នៅតំបន់អភិបាលកិច្ចភាគខាងត្បូងហ្កាហ្សា ស្ថានភាពកាន់តែធ្ងន់ធ្ងរខ្លាំង បន្ទាប់ពីជម្លោះថ្មីកើតឡើងកាលពីដើមខែឧសភា ហើយហានិភ័យខ្ពស់នៃគ្រោះទុរ្ភិក្សនៅតែមាន ។

លោក Torero បន្តថា ជាប្រចាំ ជនប៉ាឡេស្ទីនជាងពាក់កណ្តាល ពុំមានស្បៀងអហារទទួលទាននោះទេនៅផ្ទះ ហើយជាង ២០ភាគរយនៃពួកគេ គ្មានអ្វីទទួលទានទាល់តែសោះរយៈពេញមួយថ្ងៃ និងពេញមួយយប់ ។

យោងតាមការធ្វើបច្ចុប្បន្នភាពពីចំណាត់ថ្នាក់តាមដំណាក់កាលនៃសន្តិសុខស្បៀងរួម(IPC)របស់អង្គការសហប្រជាជាតិ បានឲ្យដឹងថា មនុស្សជាង ៤៩៥.០០០នាក់នៅតំបន់ហ្កាហ្សា កំពុងប្រឈមកម្រិតអសន្តិសុខស្បៀងធ្ងន់ធ្ងរបំផុត ឬគ្រោះថ្នាក់ខ្លាំងបំផុត ។

តួលេខនេះ ធ្លាក់ចុះពីការព្យាករណ៍កាលពីរយៈពេល ៣ខែមុន ថាមានមនុស្ស ១.១លាននាក់ ប៉ុន្តែវានៅតែមានចំនួនស្មើនឹង ១ភាគ៥នៃពលរដ្ឋក្នុងតំបន់ហ្កាហ្សាដដែល ៕