នាយករដ្ឋមន្ត្រីអ៊ីតាលី លោកស្រី Giorgia Meloni នៅថ្ងៃពុធ (ទី២៦ ខែមិថុនា) បានរិះគន់គ្រោងការបែងចែកតួនាទីកំពូលៗ នៅក្នុងស្ថាប័នរបស់សហភាពអឺរ៉ុប (EU) ដោយបានលើកឡើងថា អ្នកទាំងនោះមិនអើពើនឹងបំណងប្រាថ្នារបស់អ្នកបោះឆ្នោត ដែលបានបង្ហាញអំឡុងពេលបោះឆ្នោត ដើម្បីជ្រើសរើសសភាអឺរ៉ុប កាលពីដើមខែនេះ។

ប្រភពនានា កាលពីថ្ងៃអង្គារ (ទី២៥ ខែមិថុនា) បាននិយាយថា ក្រុមអឺរ៉ុបនិយមកណ្ដាលដោយភាគច្រើនសំខាន់ៗចំនួន៣ ដែលមិនរាប់បញ្ចូលក្រុមអភិរក្សនិយមរបស់លោកស្រី Meloni បានយល់ព្រមលើកិច្ចព្រមព្រៀងមួយនៅលើមុខតំណែងធំៗរបស់ប្លុក ដែលនឹងរួមបញ្ចូលទាំងការជ្រើសរើសលោកស្រី Ursula von der Leyen របស់អាល្លឺម៉ង់ ធ្វើជាប្រធានគណៈកម្មការប្រតិបត្តិរបស់ EU សម្រាប់អាណត្តិទី២។

កិច្ចព្រមព្រៀងនេះនឹងត្រូវដាក់ជូន ដើម្បីទទួលបានការយល់ព្រមពីបណ្ដាមេដឹកនាំ EU នៅក្នុងកិច្ចប្រជុំកំពូល នាទីក្រុងប្រ៊ុចសែល ប្រទេសបែលហ្ស៊ិក ដែលចាប់ផ្តើមនៅថ្ងៃព្រហស្បតិ៍ (ទី២៧ ខែមិថុនា)។ ប្រសិនបើត្រូវបានបញ្ជាក់អះអាង វានឹងតំណាងឲ្យការបន្តដំណើរពីអតីតកាល ដោយក្រុមគាំទ្រ EU អាចនៅរក្សាអំណាច ទោះបីជាមានការកើនឡើងនូវការគាំទ្រ ចំពោះគណបក្សស្តាំជ្រុលនិយម និងក្រុមដែលស្ទាក់ស្ទើរក្នុងការធ្វើសមាហរណកម្ម នៅក្នុងការបោះឆ្នោតសភាអឺរ៉ុបក៏ដោយ។

ក្រោយមានកិច្ចព្រមព្រៀងនោះ លោកស្រី Meloni បានប្រាប់សមាជិកសភាថា៖ «វាហាក់ដូចជាខ្ញុំមើលមិនឃើញពីឆន្ទៈដែលគិតគូរពីអ្វីដែលប្រជាពលរដ្ឋបានបង្ហាញតាមរយៈសន្លឹកឆ្នោត បានលេចឡើងនោះឡើយ រហូតមកដល់ពេលនេះ»។ លោកស្រីបន្ថែមថា គណបក្សដែលមើលឃើញការកើនឡើងនៃការគាំទ្រផ្នែកនយោបាយរបស់ពួកគេ នៅក្នុងការបោះឆ្នោតចុងក្រោយនេះ ត្រូវតែយកមកពិចារណាក្នុងការចរចា៕