នាយករដ្ឋមន្ត្រីប៉ូឡូញ លោក Donald Tusk នៅថ្ងៃពុធ (ទី២៦ ខែមិថុនា) នេះ បាននិយាយថា ប្រទេសរបស់លោកនឹងបន្តដំណើរទៅមុខជាមួយនឹងផែនការដែលត្រូវបានបង្កើតឡើងដោយរដ្ឋាភិបាលមុន ដើម្បីសាងសង់មជ្ឈមណ្ឌលអាកាសចរណ៍ដ៏ធំមួយ នៅកណ្តាលប្រទេស ប៉ុន្តែដោយមានការធ្វើវិសោធនកម្ម។

គួរបញ្ជាក់ថា គម្រោងអាកាសយានដ្ឋាន Central Communication Port (CPK) បានបង្កឲ្យមានភាពមិនច្បាស់លាស់ដល់រដ្ឋាភិបាលចម្រុះគាំទ្រអឺរ៉ុបរបស់លោក Tusk ដែលបានចូលកាន់តំណែងកាលពីខែធ្នូ។

រដ្ឋាភិបាលរបស់គណបក្សជាតិនិយម គឺគណបក្សច្បាប់ និងយុត្តិធម៌ (PiS) បានស្នើឲ្យសាងសង់មជ្ឈមណ្ឌលដឹកជញ្ជូនក្នុងតំបន់ដែលបម្រើដល់អ្នកដំណើរប្រហែល ៤០លាននាក់ ក្នុង ១ឆ្នាំ ជាមួយនឹងការតភ្ជាប់ផ្លូវដែកល្បឿនលឿន ក្នុងគោលបំណងជំរុញសេដ្ឋកិច្ច និងកិត្យានុភាពអន្តរជាតិរបស់ប្រទេសប៉ូឡូញ។  

ជាមួយគ្នានេះ គណបក្ស PiS ក៏បាននិយាយថា មជ្ឈមណ្ឌលនេះអាចត្រូវបានប្រើប្រាស់សម្រាប់គោលបំណងយោធាផងដែរ។ ប៉ុន្តែគម្រោងនេះត្រូវបានរិះគន់ ដោយសារតម្លៃ និងទំហំ និងដោយសារទីតាំងដែលនៅឆ្ងាយពីទីក្រុងធំៗមួយចំនួន។

លោក Tusk បានប្រាប់សន្និសីទសារព័ត៌មានថា៖ «បញ្ហារបស់ CPK គឺជាប្រធានបទនៃការប្រឈមមុខគ្នាខាងនយោបាយធ្ងន់ធ្ងរ។ ភារកិច្ចរបស់ក្រុមនេះ គឺបំបែកបំបាក់នយោបាយ ឃោសនាឲ្យជឿ និងរៀបចំការទាក់ទាញ។ ដូច្នេះ រឿងនេះត្រូវចំណាយពេល»៕