ទិវាជាតិសហគ្រាសធុនមីក្រូ តូច, និងមធ្យម គឺជាការបង្ហាញអំពីឆន្ទៈមោះមុតរបស់កម្ពុជា ក្នុង​ការ​រួម​ចំណែក​សម្រេចបាននូវ គោលដៅអភិវឌ្ឍន៍ប្រកបដោយចីរភាពឆ្នាំ ២០៣០ និងការធានាបាន​នូវ​ការ​អភិវឌ្ឍសង្គម-សេដ្ឋកិច្ច និងបរិស្ថាន ប្រកបដោយ ចីរភាព និងបរិយាបន្ន ។

អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី, រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ថ្លែង​លើកឡើងក្នុងពិធី បើក “ទិវាជាតិសហគ្រាសធុនមីក្រូ តូច និងមធ្យម លើកទី ១» នៅថ្ងៃទី ២៧ ខែមិថុនា ឆ្នាំ២០២៤ នេះថា រាជរដ្ឋាភិបាល បានកំពុងលើកកម្ពស់ការផ្សព្វផ្សាយ ការ​យល់​ដឹង និងការចូលរួមពីសំណាក់គ្រប់តួអង្គពាក់ព័ន្ធទាំងអស់ ដើម្បីលើកស្ទួយការអភិវឌ្ឍ សហ​គ្រាស​ធុន​មីក្រូ តូច និងមធ្យម ឲ្យកាន់តែខ្លាំងឡើងបន្ថែមទៀត ។ ក្នុងន័យនេះ, អគ្គបណ្ឌិតសភាចារ្យ កោត​សរសើរ និងវាយ តម្លៃខ្ពស់ ចំពោះក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង នវា​នុវត្តន៍, ទីភ្នាក់ងារកិច្ចសហប្រតិបត្តិការអាល្លឺម៉ង់ (GIZ), និង គម្រោង CAPRED របស់​រដ្ឋាភិបា​ល​អូស្ត្រាលី ដែលបានសហការរៀបចំទិវាជាតិដ៏មានសារៈសំខាន់នេះឡើង ។

អគ្គបណ្ឌិតសភាចារ្យ ឧបនាយករដ្ឋមន្ត្រី, លើកឡើងបន្តថា ក្នុងរយៈពេល ២៦ឆ្នាំចុងក្រោយ, បន្ទាប់​ពី​ការសម្រេចបាន នូវសុខសន្តិភាពេញលេញ, ឯកភាពជាតិ និងឯកភាពទឹកដីទាំងស្រុង តាម​រយៈនយោបាយឈ្នះ-ឈ្នះ របស់ សម្តេចតេជោ ហ៊ុន សែន, អតីតនាយករដ្ឋមន្ត្រី និង​បច្ចុប្បន្ន​ជាប្រធានព្រឹទ្ធសភា, កម្ពុជាធានាបាននូវអធិបតេយ្យជាតិ, សណ្តាប់ធ្នាប់សង្គម, សន្តិសុខ, សុវត្ថិភាព, និងស្ថិរភាពនយោបាយ, ព្រមទាំងរក្សាបានយ៉ាងគត់មត់ នូវស្ថិរភាព​ម៉ាក្រូ​សេដ្ឋកិច្ច និងហិរញ្ញវត្ថុសាធារណៈ ។ មិនតែ ប៉ុណ្ណោះ, កម្ពុជាបានផ្លាស់ប្ដូរមុខមាត់ថ្មីឡើងវិញ, បាន​កសាងនូវមូលដ្ឋានគ្រឹះរឹងមាំនៃសេដ្ឋកិច្ចជាតិ សម្រាប់ការអភិវឌ្ឍ, និងបាន លើកកម្ពស់​ជីវភាព​រស់​នៅរបស់ប្រជាជនទូទាំងប្រទេសតាមរយៈ៖ ការពង្រីក និងការបង្កើន ជាបន្តបន្ទាប់​នូវ​ពាណិជ្ជ​កម្មអន្ដរជាតិ ឈរលើគោលការណ៍ពហុភាគីនិយម, រួមទាំងការធ្វើពិពិធកម្មទីផ្សារ និង​ទំនិញ, ការពង្រឹង និងការពង្រីកការធ្វើសមាហរណកម្ម សេដ្ឋកិច្ច និងការជំរុញបន្ថែម នូវ​ការ​តភ្ជាប់​ក្នុង​តំបន់។ ការជំរុញ និងការទាក់ទាញបន្ថែម នូវការវិនិយោគផ្ទាល់ពីបរទេស តាមរយៈ ការ​កែ​លម្អ​នូវបរិយាកាសធុរកិច្ច និងការវិនិយោគ ។ ការពង្រឹង និងការស្តារឡើងវិញ នូវហេដ្ឋា​រចនា​សម្ព័ន្ធ​រូបវន្តដូចជា ផ្លូវថ្នល់, ស្ពាន, ប្រឡាយទឹក និងបណ្តាញអគ្គិសនី, ដើម្បីលើក​កម្ពស់​ការ​តភ្ជាប់ និងភាពប្រកួតប្រជែង; ការបន្តអភិវឌ្ឍមូលធនមនុស្ស ដើម្បីចូល​រួម​ក្នុង​សកម្មភាព​សេដ្ឋកិច្ច និងបង្កើនផលិតភាព; និងការកែទម្រង់ស្ថាប័ន និងការពង្រឹងអភិបាលកិច្ច ជាប់ជាប្រចាំ ដើម្បី​ធានា​នូវប្រសិទ្ធភាពនៃការផ្តល់សេវាសាធារណៈគ្រប់ប្រភេទ ។

អគ្គបណ្ឌិតសភាចារ្យ អូន ព័ន្ធមុនីរ័ត្ន បន្ថែមថា ការកំណត់យកថ្ងៃទី ២៧ ខែ មិថុនា សម្រាប់​ប្រារព្ធ ទិវាជាតិសហគ្រាស ធុនមីក្រូ តូច និងមធ្យម គឺជាការបង្ហាញអំពីឆន្ទៈមោះមុតរបស់កម្ពុជា ក្នុង​ការរួមចំណែកសម្រេចបាននូវគោលដៅអភិវឌ្ឍន៍ប្រកប ដោយចីរភាពឆ្នាំ ២០៣០ និងការ​ធានា​បាន​នូវការអភិវឌ្ឍសង្គម-សេដ្ឋកិច្ច និងបរិស្ថាន ប្រកបដោយចីរភាព និងបរិយាបន្ន ស្របតាម​ការ​អនុម័ត របស់មហាសន្និបាតអង្គការសហប្រជាជាតិ, ក៏ដូចជាការរួម​ចំណែក​សម្រេ​ច​បាននូវ ផែនសកម្មភាពយុទ្ធសាស្ត្រ អាស៊ាន សម្រាប់ការអភិវឌ្ឍសហគ្រាសធុនតូច និងមធ្យម ២០១៦-២០២៥ ផងដែរ៕ អត្ថបទ៖ សុន រ៉ាឌី