អភិបាលខេត្តកំពង់ចាម​ បានជំរុញឲ្យគ្រប់ភាគីពាក់ព័ន្ធ​ រួមនឹងប្រជាពលរដ្ឋ​ត្រូវចូលរួមបង្ការ ទប់ស្កាត់ និងលុបបំបាត់ នូវបញ្ហាគ្រឿងញៀន​នេះឲ្យមានប្រសិទ្ធិភាពខ្ពស់។

ឯកឧត្ដម​​ អ៊ុន​ ចាន់ដា​ អភិបាលខេត្តកំពង់ចាម​ បានលើកឡើងដូច្នេះនៅព្រឹកថ្ងៃទី២៧ ខែមិថុនា ឆ្នាំ២០២៤ ក្នុងឱកាសប្រារព្ធទិវាអន្តរជាតិប្រយុទ្ធប្រឆាំងគ្រឿងញៀន ដែល​ពិធី​នេះ​ប្រារព្ធ​ធ្វើ​ឡើង​នៅ​ភូមិ​បឹងដែងទី១ ឃុំព្រែកកក់ ស្រុកស្ទឹងត្រង់ ខេត្តកំពង់ចាម។ ឯកឧត្ដម​អភិបាលខេត្ត បាន​លើក​ទឹក​ចិត្ត​ និងជំរុញឲ្យបងប្អូនប្រជាពលរដ្ឋ​ បន្តបំផុស ដាស់តឿនដល់យុវវ័យ និង​សិស្សានុសិស្ស​ទាំងអស់ សូម​ឱ្យ​បន្ត​ស្វែង​យល់​ថែម​ទៀត​អំពី​ផល​ប៉ះពាល់ និង​គ្រោះថ្នាក់​ដែល​បង្ក​ឡើង​ដោយ​សារធាតុញៀន ក៏ដូចជាការចូលរួមជាមួយរាជរដ្ឋាភិបាល បង្កើតជាចលនាជាតិមួយ ចាត់​ទុកបញ្ហាគ្រឿងញៀន ជាបញ្ហារួម នឹងត្រូវចូលរួមបង្ការ ទប់ស្កាត់ និងលុបបំបាត់ទាំងអស់គ្នា ស្រប​តាមទស្សនៈវិស័យ (ចូលរួមទាំងអស់គ្នា ដើម្បីជីវិត និងសហគមន៏គ្មានគ្រឿងញៀន) ។ ឯកឧត្ដម​​ អ៊ុន​ ចាន់ដា​ អភិបាលខេត្ត បានសង្កត់ធ្ងន់ថា និងមិនមានការយោគយល់ និង​លើក​លែង ជាដាច់ខាតចំពោះករណីល្មើសមួយនេះ ។ ផ្ទុយទៅវិញ ឯកឧត្ដម​ អភិបាលខេត្ត​ នឹងចាត់​វិធានការ​យ៉ាង​តឹងរឹងបំផុតចំពោះបុគ្គលដែលមានសមត្ថកិច្ចណា លូក​ដៃ​ចូល​អន្តរាគមន៍​ក្នុង​បទ​ល្មើស​គ្រឿង​ញៀននេះ។

គូសបញ្ជាក់ផងដែរថា​ គ្រឿងញៀនជា៣គីឡូ​ ត្រូវដុតកម្ទេច​ចោល​ក្នុង​ទិវា​អន្តរជាតិ​ប្រយុទ្ធ​ប្រឆាំង​គ្រឿង​ញៀន​នេះផងដែរ៕