ភ្នំពេញ ៖ ម្ចាស់សហគ្រាសធុនតូច និងមធ្យម ថ្លែងនូវអារម្មណ៍រំភើបរីករាយ ខណៈរាជរដ្ឋាភិបាលកំពុងបោះជំហ៊ានបង្កើតផែនការសកម្មភាព ថ្មីៗបន្ថែម ជួយជ្រោមជ្រែង និងលើកកម្ពស់សហគ្រាសក្នុងស្រុក ឲ្យក្លាយជាសហគ្រាសមានសក្តានុពលសម្រាប់ការផ្គត់ផ្គង់ និងប្រកួត ប្រជែងលើទីផ្សារ និងការនាំចេញ។  

​ម្ចាស់សហគ្រាសជាច្រើន បានលើកឡើងក្នុងកិច្ចសម្ភាសន៍ជាមួយភ្នាក់ងារអ្នកយកព័ត៌មាន BTV នៅក្នុងកម្មពិធីទិវាជាតិ សហគ្រាសធុនមីក្រូ តូច និងមធ្យមលើកទី ១ នៅថ្ងៃទី ២៧ ខែ មិថុនា ឆ្នាំ ២០២៤ នេះថា កន្លងមកនេះ សហគ្រាសធុនមីក្រូ តូច និងមធ្យម បានដំណើរការក្នុងខ្សែច្រវាក់ផលិតកម្ម ក្នុងស្ថាភាពជួបការលំបាកខ្លះៗ ទាំងដំណើរការផលិត និងលក់ដូរនៅលើទីផ្សារ, ចំណែកមកដល់បច្ចុប្បន្ន ស្ថានភាពផ្គត់ផ្គង់ផលិតផលនៅលើទីផ្សារ បានដំណើរការរើបៗឡើងវិញ។

ម្ចាស់សហគ្រាសទាំងនោះ បានលើកឡើងស្រដៀងគ្នាទៀតថា ជុំវិញវិស័យសហគ្រាសធុនមីក្រូ តូច និងមធ្យម ឃើញថា កន្លងមកនេះ រាជរដ្ឋាភិបាលបានបានខិតខំប្រឹងប្រែងយ៉ាងខ្លាំង ក្នុងគោលដៅអភិវឌ្ឍន៍ទីផ្សារការងារ ការលើកស្ទួយសហគ្រាសធុន តូច និងមធ្យម, ធុរកិច្ច, សហគ្រិនភាព និងការអភិវឌ្ឍន៍សេដ្ឋកិច្ចក្រៅប្រព័ន្ធជាដើម, ជាក់ស្តែងការរៀបចំ ទិវាជាតិសហគ្រាសធុន មីក្រូ តូច និងមធ្យម ដែលនេះជាការបោះជំហានថ្មីមួយទៀតរស់រាជរដ្ឋាភិបាល ក្នុងការជួយជ្រោមជ្រែង និងលើកកម្ពស់សហគ្រាស ក្នុងស្រុក ឲ្យក្លាយជាសហគ្រាសមានសក្តានុពល សម្រាប់ការផ្គត់ផ្គង់ និងប្រកួតប្រជែងលើទីផ្សារ និងការនាំចេញជាដើម។  

ជុំវិញ SME នេះ, បើយោងតាមសារលិខិតសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី, អានដោយ ឯកឧត្តម ហែម វណ្ណឌី រដ្ឋមន្ត្រីក្រសួង ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា រាជរដ្ឋាភិបាលកម្ពុជាបានផ្តល់ អាទិភាពដល់ការអភិវឌ្ឍវិស័យសហគ្រាសធុនមីក្រូ តូច និងមធ្យម តាមរយៈប្រព័ន្ធអេកូឡូស៊ីដ៏ទូលំទូលាយ ដោយ ផ្តល់ការគាំទ្រលើ វិស័យសំខាន់ៗដូចជា ការបង្កើតគោលនយោបាយ ការពង្រឹងលទ្ធភាពទទួលហិរញ្ញប្បទាន ការលើកកម្ពស់ សហគ្រិនភាព ការចាប់ យកបច្ចេកវិទ្យា ការអភិវឌ្ឍជំនាញ ការលើកកម្ពស់ស្តង់ដារផលិតផល និងការបង្កភាពងាយស្រួលក្នុងការធ្វើអាជីវកម្មជាដើម។

បញ្ហានេះ រាជរដ្ឋាភិបាលទទួលស្គាល់តួនាទីដ៏សំខាន់របស់សហគ្រាសធុនមីក្រូ តូច និងមធ្យម ក្នុងការជំរុញកំណើនសេដ្ឋ កិច្ចបង្កើតការងារ និងបណ្តុះនវានុវត្តន៍, ជាក់ស្តែងទិវាជាតិសហគ្រាសធុនមីក្រូ តូច និងមធ្យមលើកទី១នេះ ជាឱកាសមួយដើម្បី បង្ហាញពីសមិទ្ធផលរបស់សហគ្រិនកម្ពុជា និងផ្តល់ជូនពួកគាត់នូវព័ត៌មាន ឧបករណ៍ និងធនធានចាំបាច់ ដើម្បីពួកគាត់អាចរីក ចម្រើននៅក្នុងទីផ្សារក្នុងស្រុក តំបន់ និងពិភពលោកដែលកាន់តែមានការប្រកួតប្រជែងខ្លាំង។

សូមបញ្ជាក់ថា បច្ចុប្បន្នសហគ្រាសធុនមីក្រូ តូច និងមធ្យម មានប្រមាណ ៩០% នៃមូលដ្ឋានផលិតកម្មអាជីវកម្មសរុប, បានផ្តល់ ការងារពី ៦០% ទៅ ៧០% និងរួមចំណែក ៥០% នៃផលិតផលក្នុងស្រុកសរុប។ ចំណែកនៅក្នុងតំបន់អាស៊ាន សហគ្រាសធុនមី ក្រូ តូច និងមធ្យម មានចំនួនពីជាង ៩៧% ទៅជិត ១០០% និងរួមចំណែកជិត ៤៥% នៃផលិតផលក្នុងស្រុកសរុប របស់ ប្រទេសជាសមាជិកអាស៊ាន៕

អត្ថបទ៖ សុន រ៉ាឌី