ឯកអគ្គរដ្ឋទូតរងអាមេរិក លោក Robert Wood បាននិយាយថា សហរដ្ឋអាមេរិកនឹងប្រឈមមុខជាមួយរុស្ស៊ី នៅក្រុមប្រឹក្សាសន្តិសុខអង្គការសហប្រជាជាតិ (UNSC) នាថ្ងៃសុក្រ (ទី២៨ ខែមិថុនា) នេះ ជុំវិញការរំលោភលើការដាក់ទណ្ឌកម្មអាវុធ ចំពោះកូរ៉េខាងជើង ហើយនឹងស្វែងរកទស្សនៈរបស់ចិន ជុំវិញការបង្កើនទំនាក់ទំនង រវាងទីក្រុងម៉ូស្គូ និងទីក្រុងព្យុងយ៉ាង។

កិច្ចប្រជុំនៃក្រុមប្រឹក្សាដែលមានសមាជិក ១៥ប្រទេសនេះ កើតមានឡើងបន្ទាប់ពីប្រធានាធិបតីរុស្ស៊ី លោក វ្ល៉ាឌីមៀរ ពូទីន បានធ្វើដំណើរទៅកាន់ទីក្រុងព្យុងយ៉ាង កាលពីសប្តាហ៍មុន ដើម្បីចុះហត្ថលេខាលើកិច្ចព្រមព្រៀងជាមួយមេដឹកនាំកូរ៉េខាងជើង លោក គីម ជុងអ៊ុន ដែលមេដឹកនាំទាំង២ បានយល់ព្រមផ្តល់ជំនួយយោធាឲ្យគ្នាទៅវិញទៅមក ប្រសិនបើប្រទេសទាំង២ ប្រឈមនឹងការលុកលុយដោយប្រដាប់អាវុធ។

លោក Wood បានប្រាប់សារព័ត៌មាន Reuters នៅមុនកិច្ចប្រជុំថា «នេះគួរតែជាការព្រួយបារម្ភយ៉ាងខ្លាំង ចំពោះសហគមន៍សកលលោកទាំងមូល» ដោយចោទប្រកាន់រុស្ស៊ីថា «ជាអ្នកគាំទ្រដ៏សំខាន់ដល់រដ្ឋបញ្ឆោតទាំងឡាយ ដែលរំលោភលើសេចក្ដីសម្រេចរបស់ UNSC ដដែលៗរាប់មិនអស់»។

លោកបានបន្តថា៖ «នេះជារឿងមិនធ្លាប់មានពីមុនមក ហើយយើងត្រូវបង្ហាញឲ្យឃើញពីអ្វីដែលវាកើតឡើង។ យើងក៏ចង់ឃើញនូវអ្វីដែលប្រទេសចិនត្រូវនិយាយ អំពីកិច្ចសហប្រតិបត្តិការយោធា ដែលកំពុងកើនឡើងនេះ រវាងកូរ៉េខាងជើង និងរុស្ស៊ី។ ទំនាក់ទំនងនេះមិនអាចចាត់ទុកថា នេះជាការវិវត្តន៍វិជ្ជមាននោះទេ»។

គួរបញ្ជាក់ថា ដោយមានឈ្មោះផ្លូវការថា ជាសាធារណរដ្ឋប្រជាមានិតប្រជាធិបតេយ្យកូរ៉េ (DPRK) កូរ៉េខាងជើងបានស្ថិតនៅក្រោមការដាក់ទណ្ឌកម្មរបស់អង្គការសហប្រជាជាតិ (UN) ចាប់តាំងពីឆ្នាំ២០០៦ ជុំវិញកម្មវិធីនុយក្លេអ៊ែរ និងមីស៊ីលបាលីស្ទិករបស់ខ្លួន ហើយវិធានការទាំងនោះត្រូវបានពង្រឹង ក្នុងរយៈពេលជាច្រើនឆ្នាំ ដោយមានការជួយជ្រោមជ្រែងពីរុស្ស៊ី៕