ជនប៉ាឡេស្ទីន នាំគ្នាបួងសួងដល់វិញ្ញណក្ខន្ធកម្មករសង្រ្គោះបន្ទាន់ ៣នាក់ ដែលត្រូវបានសម្លាប់ដោយសារការវាយប្រហារតាមច្រកអាកាសរបស់អ៊ីស្រាអែល លើការិយាល័យកណ្តាលរបស់សេវាកម្មសង្រ្គោះបន្ទាន់ជនស៊ីវិលប៉ាឡេស្ទីន ស្ថិតក្នុងជំរំ Nuseirat នៅភាគកណ្តាលតំបន់ហ្កាហ្សាស្រ្ទីប ។

សាកសពរបស់ពួកគេ ត្រូវបាននាំយកទៅកាន់មន្ទីរពេទ្យ Al Aqsa Martyrs មុនពេលការបញ្ចុះរបស់ពួកគេ ។

ពួកគេ និយាយថា នៅមុនយប់ពាក់កណ្តាលអាធ្រាត្រ ការវាយប្រហារតាមច្រកអាកាស ត្រូវចំមជ្ឈមណ្ឌលសេវាកម្មសង្រ្គោះបន្ទាន់ជនស៊ីវិលប៉ាឡេស្ទីន ។ ការស្លាប់ថ្មីនេះ បានធ្វើចំនួនបុគ្គលិកស្លាប់របស់ពួកគេដោយសារការវាយប្រហាររបស់អ៊ីស្រាអែល កើនឡើងដល់ ៧៤នាក់ ចាប់តាំងថ្ងៃទី ៧ ខែតុលា ឆ្នាំ ២០២៣រហូតមក ។

លោក Rami Al-Aidi គឺជាប្រធានសេវាកម្មការពារជនស៊ីវិល និយាយថា ចាប់តាំងពីថ្ងៃដំបូងមកម្ល៉េះ ដែលពួកយើងបានអំពាវនាវដល់ពិភពលោក និងអ្នករាល់គ្នា ធ្វើយ៉ាងណាការពារក្រុមសេវាកម្មការពារជនស៊ីវិល ហើយអ្នកដែលធ្វើការនៅទីវាល អំឡុងការវាយប្រហារ ។

ដោយឡែក លោក Mohammed Al-Mugheir គឺជាប្រធានផ្នែកគាំទ្ររបស់ក្រុមការពារជនស៊ីវិលប៉ាឡេស្ទីន និយាយថា ក្រុមសង្រ្គោះបន្ទាន់របស់លោក ប្រឈមការងារលំបាកច្រើនណាស់ និងកង្វះខាតសព្វបែបយ៉ាង ដោយសារការវាយប្រហាររបស់អ៊ីស្រាអែល ៕