ប្រភពពីមន្ត្រីអាមេរិកពីររូបបាននិយាយថា រដ្ឋបាលលោកប្រធានាធិបតី ចូ បៃដិន (Joe Biden) បានបញ្ជូនទៅឱ្យអ៊ីស្រាអែល នូវគ្រាប់រំសេវជាច្រើន រួមទាំងគ្រាប់បែកទម្ងន់ ២.០០០ ផោន (ជាង ៩០៧ គីឡូក្រាម) ដែលមានការបំផ្លិចបំផ្លាញខ្លាំង ចំនួនជាង ១០.០០០ គ្រាប់ និងមីស៊ីល ហេលហ្វាយអឺ (Hellfire) រាប់ពាន់គ្រាប់ ចាប់តាំងពីការចាប់ផ្តើមនៃសង្រ្គាមនៅក្នុងតំបន់ហ្កាហ្សា មក។

រវាងការចាប់ផ្តើមនៃសង្រ្គាមកាលពីខែតុលា និងប៉ុន្មានថ្ងៃថ្មីៗនេះ សហរដ្ឋអាមេរិកបានគ្រាប់បែក អ៊ិមខេ-៨៤ (MK-84) ទម្ងន់ ២.០០០ ផោនយ៉ាងតិចចំនួន ១៤.០០០គ្រាប់, គ្រាប់បែកទម្ងន់ ៥០០ ផោនចំនួន ៦.៥០០គ្រាប់, មីស៊ីលកំណត់គោលដៅប្រព័ន្ធទូរបញ្ជា ហេលហ្វាយអឺ បាញ់ពីអាកាសទៅដីចំនួន ៣.០០០គ្រាប់, មីស៊ីលកំណត់គោលដៅពីអាកាសទៅដី ១.០០០គ្រាប់, គ្រាប់បែកទម្លាក់ពីលើអាកាសទំហំតូច ២.៦០០គ្រាប់ និងគ្រាប់រំសេវផ្សេងទៀត នេះបើយោងតាមមន្ត្រី ដែលសុំមិនបញ្ចេញឈ្មោះនោះ។

ខណៈពេលដែលប្រភពមិនបានផ្តល់ពេលវេលាសម្រាប់ការដឹកជញ្ជូននេះ តួលេខសរុបដ៏ខ្ពស់នោះបានបង្ហាញថាមិនមានការធ្លាក់ចុះគួរឱ្យកត់សម្គាល់នៅក្នុងការគាំទ្រផ្នែកយោធារបស់សហរដ្ឋអាមេរិក សម្រាប់សម្ព័ន្ធមិត្តរបស់ខ្លួននោះទេ បើទោះបីជាមានការអំពាវនាវជាអន្តរជាតិឱ្យដាក់កម្រិតលើការផ្គត់ផ្គង់អាវុធ និងការសម្រេចរបស់រដ្ឋបាលអាមេរិកនាពេលថ្មីៗនេះដើម្បីផ្អាកការដឹកជញ្ជូនគ្រាប់បែកដ៏ខ្លាំងក្លាចំនួនមួយជើងក៏ដោយ។

ក្រុមអ្នកជំនាញបាននិយាយថា ខ្លឹមសារនៃការដឹកជញ្ជូនហាក់ដូចជាស្របទៅនឹងអ្វីដែលអ៊ីស្រាអែល នឹងត្រូវការបំពេញបន្ថែមនូវការផ្គត់ផ្គង់ដែលបានប្រើប្រាស់នៅក្នុងយុទ្ធនាការយោធារយៈពេលប្រាំបីខែរបស់ខ្លួននៅក្នុងតំបន់ហ្កាហ្សា ដែលបានចាប់ផ្តើមបន្ទាប់ពីការវាយប្រហារកាលពីថ្ងៃទី០៧ ខែតុលា ដោយពួកសកម្មប្រយុទ្ធប៉ាឡេស្ទីនហាម៉ាស៕