ធនាគារកណ្តាលរបស់សហភាពមីយ៉ាន់ម៉ា បានបដិសេធរបាយការណ៍របស់អង្គការសហប្រជាជាតិ ដែលថារដ្ឋាភិបាលរបបសឹករបស់ប្រទេសនេះនៅតែអាចទទួលបានប្រាក់ និងសព្វាវុធសម្រាប់សង្គ្រាមរបស់ខ្លួនប្រឆាំងនឹងកងកម្លាំងប្រឆាំងរដ្ឋប្រហារ ដោយនិយាយថា ស្ថាប័នហិរញ្ញវត្ថុក្រោមការត្រួតពិនិត្យរបស់ធនាគារ បានអនុវត្តតាមនីតិវិធីដែលបានកំណត់។

ធនាគារកណ្តាលមីយ៉ាន់ម៉ា «បានសម្តែងការជំទាស់យ៉ាងខ្លាំងចំពោះរបាយការណ៍របស់អ្នករាយការណ៍ពិសេសរបស់អង្គការសហប្រជាជាតិ» នេះបើយោងតាមសេចក្តីថ្លែងការណ៍មួយដែលត្រូវបានចេញផ្សាយនៅក្នុងសារព័ត៌មានរបបសឹក កាលពីថ្ងៃសៅរ៍ (២៩ មិថុនា)។ ដោយបន្ថែមថា «របាយការណ៍របស់អង្គការសហប្រជាជាតិធ្វើឱ្យប៉ះពាល់យ៉ាងធ្ងន់ធ្ងរដល់ផលប្រយោជន៍របស់ជនស៊ីវិលមីយ៉ាន់ម៉ា និងទំនាក់ទំនងរវាងមីយ៉ាន់ម៉ា និងប្រទេសដទៃទៀត»។

អ្នករាយការណ៍សិទ្ធិមនុស្សរបស់មីយ៉ាន់ម៉ា លោក ថម អាន់ឌ្រូស៍ (Tom Andrews) បានរាយការណ៍កាលពីថ្ងៃពុធថា ខណៈពេលដែលកិច្ចខិតខំប្រឹងប្រែងអន្តរជាតិដើម្បីដាក់ឱ្យរបបសឹកឱ្យនៅឯកោហាក់ដូចជាបានរារាំងលទ្ធភាពរបស់ខ្លួនក្នុងការទិញគ្រឿងយុទ្ធោបករណ៍ ប៉ុន្តែខ្លួននៅតែនាំចូលអាវុធមានតម្លៃ ២៥៣ លានដុល្លារ, បច្ចេកវិទ្យាប្រើពីរដង, ឧបករណ៍ផលិត និងសម្ភារៈផ្សេងៗទៀតក្នុងរយៈពេល ១២ ខែដល់ខែមីនា ឆ្នាំនេះ។

ធនាគារកណ្តាលបាននិយាយថា ធនាគារក្នុងស្រុក និងអន្តរជាតិដែលចូលរួមក្នុងប្រតិបត្តិការជាមួយមីយ៉ាន់ម៉ា បានឆ្លងកាត់វិធានការប្រុងប្រយ័ត្នយ៉ាងទូលំទូលាយសម្រាប់ទំនាក់ទំនងអាជីវកម្ម និងប្រតិបត្តិការទាំងអស់ ហើយប្រតិបត្តិការហិរញ្ញវត្ថុគឺសម្រាប់តែការនាំចូលទំនិញសំខាន់ៗ និងតម្រូវការជាមូលដ្ឋានសម្រាប់ជនស៊ីវិលមីយ៉ាន់ម៉ាប៉ុណ្ណោះ៕