កំពង់ឆ្នាំង៖ ក្នុងការស្វែងរកជំនួយទាំងក្នុង និងក្រៅប្រទេស ក្នុងការស្ថាបនាអគារវប្បធម៌ គង គឺដើម្បីចូលរួមថែរក្សា និងលើកកម្ពស់វប្បធម៌ខ្មែរសម្រាប់អ្នកជំនាន់ក្រោយ និងមានតម្លៃមិនអាចកាត់ថ្លៃបានសម្រាប់អត្តសញ្ញាណជាតិខ្មែរ ក្នុងអណត្តិទី៧នៃរាជរដ្ឋាភិបាលកម្ពុជា ដែលមានសម្តេចធិបតី ហ៊ុន ម៉ាណែត ជានាយករដ្ឋមន្ត្រី។ លោកនាយកប្រតិបត្តអង្គការតុកកែញញឹមកម្ពុជាបានថ្លែងបែបនេះ ក្នុងពេលសម្ភោធដាក់អោយប្រើប្រាស់អគារវប្បធម៌គង នាល្ងាចថ្ងៃទី២៩ ខែមិថុនា ឆ្នាំ២០២៤នៅស្រុកសាមគ្គីមានជ័យ ដោយមានការអញ្ជើញជាអធិបតីពីឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំយុវជន និងកីឡា។

 លោក ងន់ សុខលាភ នាយកប្រតិបត្តអង្គការតុកកែញញឹមកម្ពុជា បានថ្លែងបន្តថា៖ រយៈពេល១០ឆ្នាំមកហើយ ដែលអង្គការតុកកែញញឹមកម្ពុជា បានបើកសាលារៀនគំរូនៅតំបន់ដាច់ស្រយាលក្នុងស្រុកសាមគ្គីជ័យ ខេត្តកំពង់ឆ្នាំង ក្នុងគោលបំណងលើកកម្ពស់ជីវភាពរស់នៅរបស់សហគមន៍ ដែលមកដល់ឆ្នាំសិក្សា២០២៣និង២០២៤នេះ មានកុមារ៥០០នាក់កំពុងសិក្សា ក្រោមអនុសារនៈយោគយល់រវាងក្រសួងអប់រំយុវជន និងកីឡា និងអង្គការតុកកែញញឹម និងបានបណ្តុះបណញតាលវិជ្ជាជីវៈផ្សេងៗ និងផ្តល់ការងារដល់យុវជនបានធ្វើជាង ៤០០កន្លែង។ កុមារ និងយុវជនទាំងអស់មានសមត្ថភាពទេពកោសល្យ ដើម្បីលើកកម្ពស់វប្បធម៌ និងសិល្បៈខ្មែរសម្រាប់អ្នកជំនាន់ក្រោយ អង្គការតុកកែញញឹមបានស្ថាបនាអាគារវប្បធម៌នេះឡើង ដោយបានបំពាក់នូវឧបករណ៍ទំនើបៗ ដើម្បីបម្រើដល់វិស័យសិក្សាធិការវប្បធម៌ និងសិល្បៈខ្មែរយើង។ អគារវប្បធម៌ គង នេះ នឹងបម្រើដល់ការថតសម្លេង សំដែងសិល្បៈ ការជួបជុំក្នុងពិធីផ្សេងៗរបស់សិស្សានុសិស្ស យុវជន សិសល្បៈករសិល្បៈការនីទាំងក្នុង និងក្រៅប្រទេស ដើម្បីលើកតម្កើង និងផ្លាស់ប្តូរវប្បធម៌ និងការចែករំលែកចំណេះដឹងពីគ្នាទៅវិញទៅមកផងដែរ។

 ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំយុវជន និងកីឡាបានកោតសសើរនូវស្នាដៃកូនខ្មែរ និងជនជាតិស្វីស ដែលបានសិក្សាស្រាវជ្រាវកសាងអគារ គង ដែលបានផ្សារភ្ជាប់ផ្នែកស្ថាបត្យកម្ម ដែលមានលក្ខណៈពិសេសនៃទេពកោសល្យ តាមលំនាំស្ថាបត្យកម្មខ្មែរដ៏អស្ចារ្យនាសម័យអង្គរនៃយើង។ ឯកឧត្តមជឿជាក់ថា អគារវប្បធម៌ គង នេះ នឹងក្លាយជាមជ្ឈមណ្ឌលវប្បធម៌ និងបម្រើជាពហុបំណងក្នុងការចូលរួមចំណែកលើកស្ទួយសិល្បៈវប្បធម៌ខ្មែរ អោយកាន់តែរីកចម្រើន ក៏ដូចជាការចូលរួមចំណែកក្នុងការលើកទឹកចិត្ត ការច្នៃប្រឌិតការផ្សារភ្ជាប់ទំនាក់ទំនង និងការស្វែងយល់ពីវប្បធម៌សម្រាប់យុវជនជំនាន់ក្រោយ បានយល់ដឹង ស្គាល់ ចេះចាំទាំងអស់គ្នា៕ អត្ថបទ៖ កាំង ហុងវាស្នា