ក្រុមអ្នកវិភាគបាននិយាយថា ការបោះឆ្នោតជុំទីមួយនៃការបោះឆ្នោតប្រធានាធិបតី របស់ប្រទេសអ៊ីរ៉ង់ បានបង្ហាញពីការថយចុះនៃការគាំទ្រសម្រាប់ទាំងអ្នកនយោបាយកំណែទម្រង់ និងអ្នកអភិរក្សនិយម ទោះបីជាពលរដ្ឋបោះឆ្នោតមួយចំនួនកំពុងជំរុញឱ្យមានការផ្លាស់ប្តូរដោយវិធីសាស្រ្តគាំទ្របេក្ខជនកំណែទម្រង់តែមួយគត់នៅក្នុងបេក្ខភាពប្រធានាធិបតីក៏ដោយ ។

លោក ម៉ាស៊ូដ ប៉េហ្ស៊ិសឃិន (Masoud Pezeshkian) ដែលអ្នកនយោបាយកំណែទម្រង់ និងប្រកាន់ជំហរកណ្ដាល រួមជាមួយនឹងបេក្ខជនអភិរក្សនិយមជ្រុល លោក សៃអ៊ីត ចាលីលី (Saeed Jalili) បាននាំមុខក្នុងការបោះឆ្នោតដែលបានធ្វើឡើងកាលពីថ្ងៃសុក្រ សប្ដាហ៍មុន ដើម្បីជំនួសតំណែងប្រធានាធិបតីអភិរក្សនិយមជ្រុល លោក អ៊ីប្រាហ៊ីម រ៉េស៊ី (Ebrahim Raisi) ដែលបានស្លាប់នៅក្នុងការធ្លាក់ឧទ្ធម្ភាគចក្រកាលពីខែមុន។

លោក អាលី វែស (Ali Vaez) មកពីវិទ្យាស្ថានស្រាវជ្រាវវិបត្តិអន្តរជាតិ បាននិយាយថា ការបោះឆ្នោតកាលពីថ្ងៃសុក្រ ដែលមានអ្នកទៅបោះឆ្នោតតិចជាប្រវត្តិសាស្ត្រនោះ «បង្ហាញយ៉ាងច្បាស់ថា មូលដ្ឋានក្រុមកំណែទម្រង់ និងក្រុមអភិរក្សនិយម បានធ្លាក់ចុះគួរឱ្យកត់សម្គាល់»។

ក្នុងចំណោមអ្នកមានសិទ្ធិបោះឆ្នោតចំនួន ៦១ លាននាក់ មានតែប្រហែល ៤០ ភាគរយប៉ុណ្ណោះបានបោះឆ្នោត ដែលជាកំណត់ត្រានៃចំនួនអ្នកទៅបោះឆ្នោតទាបបំផុតនៅក្នុងសាធារណរដ្ឋអ៊ីស្លាម ដែលមនុស្សមួយចំនួនបានបាត់បង់ជំនឿលើដំណើរការនេះ ខណៈសន្លឹកឆ្នោតជាងមួយលានសន្លឹកត្រូវបានបំផ្លាញ៕