នគរបាល នៅប្រទេសអាហ្សង់ទីន កាលពីថ្ងៃអាទិត្យ (ទី៣០ ខែមិថុនា) បានប៉ះទង្គិចជាមួយបាតុករដែលកំពុងទាមទារយុត្តិធម៌ សម្រាប់កុមារដែលបាត់ខ្លួន។

ក្នុងហេតុការណ៍នោះ គេឃើញក្រុមបាតុករបានគប់ដុំថ្មដាក់សណ្ឋាគារមួយ ក្នុងសង្កាត់ 9 de Julio ជាកន្លែង ដែលមីងរបស់កុមារម្នាក់ គឺលោកស្រី Laudelina Pena ស្នាក់នៅក្នុងនោះ។ ស្ត្រីរូបនោះធ្លាប់បានអះអាងប្រាប់សមត្ថកិច្ចថា កុមារអាយុ ៥ឆ្នាំម្នាក់ឈ្មោះ Loan ត្រូវរថយន្តបុកបណ្ដាលឲ្យស្លាប់។ ប៉ុន្តែក្រុមអ្នកតវ៉ានិយាយថា លោកស្រីជាប់ពាក់ព័ន្ធនឹងការបាត់ខ្លួនរបស់ក្មេងនេះ ហើយបានចាត់ទុកលោកស្រីថា ជាឧក្រិដ្ឋជន។

យោងតាមប្រព័ន្ធផ្សព្វផ្សាយក្នុងស្រុក បានឲ្យដឹងថា ដើម្បីបំបែកក្រុមបាតុករ នៅជិតសណ្ឋាគារនោះ មន្ត្រីនគរបាលបានប្រើប្រាស់គ្រាប់កាំភ្លើងជ័រ និងឧស្ម័នបង្ហូរទឹកភ្នែក ខណៈដែលពួកគេព្យាយាមជម្លៀសលោកស្រី Laudelina ទៅទីតាំងផ្សេង ដើម្បីការពាររូបគាត់។

គួរបញ្ជាក់ថា កាលពីសប្តាហ៍មុន អាជ្ញាធរបានឃុំខ្លួនមេកងទ័ពជើងទឹកចូលនិវត្តន៍ម្នាក់ និងភរិយារបស់លោក ដែលជាអតីតបុគ្គលិកសាលាក្រុង ពីបទសង្ស័យមានពាក់ព័ន្ធនឹងបាត់ខ្លួនរបស់កុមារ Loan៕