ប៉ារ៉ាឡាំពិក៖ កីឡាករ វ៉ាន វ៉ុន បានចាកចេញពីកម្ពុជាទៅប្រទេសជប៉ុនហើយកាលពីយប់ថ្ងៃទី២២ ខែសីហា ឆ្នាំ២០២១ ដើម្បីចូលរួមប្រកួតក្នុងព្រឹត្តិការណ៍កីឡាប៉ារ៉ាឡាំពិក (Tokyo 2020 Paralympic Games) នៅទីក្រុងតូក្យូ ដែលនឹងប្រព្រឹត្តទៅចាប់ពីថ្ងៃទី២៤ ខែសីហារហូតដល់ថ្ងៃទី០៥ ខែកញ្ញា ឆ្នាំ២០២១ ខាងមុខ បន្ទាប់ពីព្រឹត្តិការណ៍កីឡាជនពិការ ៤ឆ្នាំម្ដងនេះត្រូវបានពន្យារពេលអស់រយៈពេល ១ឆ្នាំកន្លងមក។
ឯកឧត្តម យី វាសនា អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជាមានប្រសាសន៍ថា វ៉ាន វ៉ុន គឺជាបេក្ខភាពកីឡាករជនពិការតំណាងកម្ពុជាតែម្នាក់ប៉ុណ្ណោះ ដែលត្រូវបានជ្រើសរើសបញ្ជូនទៅប្រកួតព្រឹត្តិការណ៍ប៉ារ៉ាឡាំពិកនៅទីក្រុងតូក្យូ ក្នុងនាមអត្តពលិកទទួលបានសិទ្ធអនុគ្រោះ ដោយផ្អែកលើគុណផលនៃការប្រកួតលក្ខណៈអន្ដរជាតិកន្លងមក និងត្រូវប្រកួតលើវិញ្ញាសាប្រណាំងរទេះកម្រិតពិការ T-54 ១០០ម៉ែត្រ។ អគ្គលេខាធិការដដែលបានបង្ហាញនូវសុទិដ្ឋិនិយមខ្ពស់ចំពោះការចូលរួមប្រកួត ដោយយោងលើការខិតខំប្រឹងប្រែងរបស់កីឡាករ វ៉ាន វ៉ុន ពិសេសឯកឧត្តមបានសង្កត់ធ្ងន់ថា ការចូលរួមនេះគឺជាសក្ខីកម្មមួយក្រៅពីការប្រកួតប្រជែង ក៏ជាការទូតមួយដ៏សំខាន់នៃចំណងសាមគ្គីភាព និងមិត្តភាពរវាងកម្ពុជា-ជប៉ុនតាមរយៈការជម្នះនូវឧបសគ្គក្នុងបរិបទកូវីដ-១៩ ដើម្បីអបអរសាទរការធ្វើម្ចាស់ផ្ទះព្រឹត្តិការណ៍កម្រិតពិភពលោកនេះផងដែរ។
គួរបញ្ជាក់ថា ការប្រកួតកីឡាប៉ារ៉ាឡាំពិកឆ្នាំ២០២០ ត្រូវបានបន្ដធ្វើនៅប្រទេសជប៉ុន បន្ទាប់ពីប្រទេសនៅអាស៊ីមួយនេះបានរៀបចំការប្រកួត កីឡាអូឡាំពិករដូវក្ដៅដោយជោគជ័យកាលពីថ្មីៗកន្លងទៅ។ ចំពោះបេសកកម្មចូលរួមព្រឹត្តិការណ៍ប៉ារ៉ាឡាំពិកនេះដែរ ប្រតិភូកីឡាជនពិការកម្ពុជាគឺដឹកនាំដោយលោក យី សុភក្ដ្រា ដែលជានាយបេសកកម្មផង ជាគ្រូបង្វឹកផង និងជាអ្នកសម្របសម្រួលកូវីដ-១៩ ផង។ លោក យី សុភក្ដ្រា និងកីឡាករ វ៉ាន វ៉ុន បានធ្វើដំណើរទៅដល់ទីក្រុងតូក្យូកាលពីព្រឹកថ្ងៃទី២៣ ខែសីហានេះ ហើយតាមគម្រោងក្រោយបញ្ចប់បេសកកម្មប្រកួតកីឡាប៉ារ៉ាឡាំពិកឆ្នាំ២០២០ ប្រតិភូ និងកីឡាករជនពិការកម្ពុជានឹងធ្វើដំណើរមកត្រឡប់មកមាតុភូមិវិញនាថ្ងៃទី០៨ ខែកញ្ញា ឆ្នាំ២០២១ ខាងមុខ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
