វិមានក្រឹមឡាំង និយាយនៅថ្ងៃចន្ទនេះថា សេចក្តីរាយការណ៍ថា អ៊ុយក្រែន កំពុងពង្រឹងការដាក់ពង្រាយទាហានរបស់ខ្លួននៅតាមបណ្តោយព្រំដែនជាមួយបេឡារុស គឺជាមូលហេតុត្រូវព្រួយបារម្ភ ។

បេឡារុស ដែលជាសម្ព័ន្ធមិត្តជិតស្និតរបស់រុស្ស៊ី ដែលបានផ្តល់ការគាំទ្រដល់យុទ្ធនាការសឹករបស់ទីក្រុងម៉ូស្គូនៅអ៊ុយក្រែន និយាយកាលពីសប្តាហ៍មុនថា ទីក្រុងគីវ កំពុងពង្រឹងកងកម្លាំងរបស់ពួកគេ នៅតាមព្រំដែនប្រទេសទាំង ២ ។

លោក Dmitry Peskov គឺជាអ្នកនាំពាក្យវិមានក្រឹមឡាំង និយាយថា បេឡារុស គឺជារដ្ឋសហភាព ហើយពួកយើងមានរបៀបពិធីនៃការសន្ទនា តាមរយៈស្ថាប័នពាក់ព័ន្ធទាំងអស់ រួមទាំងសេវាកម្មសន្តិសុខ ។

លោកបន្តថា ក្រសួងការពារជាតិរបស់ពួកយើង នៅតែរក្សាការប្រាស្រ័យទាក់ទងភាពជាដៃគូឥតឈប់ឈរ ។ ដូច្នេះហើយ នេះគឺជាមូលហេតុត្រូវព្រួយបារម្ភចំពោះសេចក្តីរាយការណ៍ថា អ៊ុយក្រែនពង្រឹងកងកម្លាំងតាមព្រំដែនជាមួយបេឡារុស ពីព្រោះថា វាមិនមែនជាក្តីបារម្ភសម្រាប់តែទីក្រុង Minsk មួយប៉ុណ្ណោះទេ ប៉ុន្តែវាគឺក្តីបារម្ភសម្រាប់ទីក្រុងម៉ូស្គូផងដែរ ដោយសារតែពួកយើងគឺជាសម្ព័ន្ធមិត្ត និងជាដៃគូនឹងគ្នា ៕