​ប្រណាំង​កង់៖ ​កីឡាករ​​អ៊ីតាលី Damiano Caruso បាន​ប្រជែង​ឈ្នះ​ការប្រកួត​ដំណាក់​កាល​ទី៩ នៃ​ព្រឹត្តិការណ៍ប្រណាំង​កង់ Grand Tour, Vuelta a Espana ខណៈដែល​អ្នកការពារ​តំណែង​ជើង​ឯក Primoz Roglic នៅតែ​បន្ត​នាំមុខក្នុង​តារាង​រួម​ដដែល​។

​​ដំណាក់កាល​ទី៩ ដែលមាន​ចំងាយ​ផ្លូវ ១៨៨​គីឡូម៉ែត្រ​ឆ្លងកាត់​តំបន់ភ្នំ កីឡាករ​របស់​ក្រុម​ប្រណាំង Bahrain-Victorious បានមក​ដល់ទី​ព្រ័ត្រ​មុនគេ​ប្រើពេល ៥ម៉ោង ៣នាទី ១៤វិនាទី និង​ដាច់​អ្នក​លេខ២ ជាង ១នាទី​។ ​អ្នកការពារ​ជើងឯកកីឡាករ​ស្លូ​វេ​នី Primoz Roglic របស់​ក្រុម​ប្រណាំង Jumbo-Visma បានមក​ដល់ទី​ព្រ័ត្រលំដាប់​ទី២ តាម​ពីក្រោយ​អ្នកឈ្នះ ១នាទី ៥វិនាទី តែ​គ្រប់គ្រាន់​ដើម្បី​រក្សា​ការនាំ​មុខ​ក្នុង​តារាង​រួម​។ ​​ចំណែក​អ្នក​លេខ៣ ក្នុងដំណាក់កាល​ទី៩ នេះ​គឺ​កីឡាករ​អេ​ស្ប៉ា​ញ Enric Mas របស់​ក្រុម Movistar​។​

​​ងាក​មក​តារាង​រួម Primoz Roglic នាំមុខគេ​មាន​ថេរវេលា​ល្អ​ជាង​អ្នក​លេខ២ Enric Mas ២៨វិនាទី និង​លេខ៣ កីឡាករ​កូ​ឡុំ​ប៊ី Miguel Angel Lopez យឺត​ជាង ១នាទី ២១វិនាទី​។ ​ថ្ងៃ​ចន្ទ​នេះ​មិន​មាន​ការ​ប្រកួត​ឡើយ​ដោយ​ កីឡាករ​ទាំងអស់​ត្រូវ​សម្រាកមុន​ចាប់ផ្តើម​ដំណាក់កាល​ទី១០ ថ្ងៃ​អង្គារស្អែក​ដែលមាន​ចំងាយ​ផ្លូវ ១៨៩​គីឡូម៉ែត្រ​៕

​អត្ថបទ​៖​នាង សុភា​វុ​ធ