មន្ត្រីបាននិយាយកាលពីថ្ងៃចន្ទថា ប្រទេសកូរ៉េខាងត្បូង នឹងដាក់ចេញនូវយុទ្ធសាស្ត្ររបស់ក្រសួងគ្រប់គ្រងប្រជាជន  ដើម្បីដោះស្រាយអត្រាកំណើតទាប និងចំនួនប្រជាជនដែលមានវ័យចំណាស់ ឲ្យយ៉ាងឆាប់រហ័ស ដែលបានកើតចេញជាបញ្ហាប្រឈមខ្លាំងបំផុតមួយចំនួន ដែលប្រទេសនេះ កំពុងជួបប្រទះ។

រដ្ឋាភិបាល បានបង្ហាញផែនការនេះ បន្ទាប់ពីកិច្ចប្រជុំកម្រិតខ្ពស់ជាមួយគណបក្សកាន់អំណាច ដោយនិយាយថា សេចក្តីព្រាងច្បាប់គ្រប់គ្រងរបស់រដ្ឋាភិបាលដែលត្រូវបានកែប្រែ នឹងត្រូវស្នើឡើង ក្នុងខែកក្កដា សម្រាប់បង្កើតក្រសួងនេះ។

នៅពេលដែលត្រូវបានបង្កើតឡើង ក្រសួងថ្មីនេះ នឹងផ្តោតលើយុទ្ធសាស្ត្រ និងផែនការសម្រាប់បញ្ហាចំនួនប្រជាជន ដូចជាអត្រាកំណើតទាប ប្រជាជនដែលមានវ័យចំណាស់ កម្លាំងពលកម្ម និងអន្តោប្រវេសន៍ បម្រើជាមូលដ្ឋានត្រួតពិនិត្យបញ្ហាទាំងនេះ។

ក្រសួងនេះ ក៏នឹងទទួលបន្ទុករៀបចំគោលនយោបាយប្រជាជន និងយុទ្ធសាស្ត្ររយៈពេលមធ្យម រហូតដល់រយៈពេលវែង ដោយទទួលយកភារកិច្ចដែលគ្រប់គ្រងដោយក្រសួងសុខាភិបាល និងក្រសួងហិរញ្ញវត្ថុ នាពេលបច្ចុប្បន្ននេះ។

មន្ត្រីបាននិយាយថា ក្រសួងនេះ ក៏នឹងទទួលបន្ទុកលើការបែងចែក និងសម្របសម្រួលថវិកាសម្រាប់ការប្រយុទ្ធប្រឆាំងនឹងអត្រាកំណើតទាប នៅតាមក្រសួងពាក់ព័ន្ធនានា។