​អាហ្វហ្គានីស្ថាន៖ ក្រសួងការពារជាតិ​ច​ក្រ​ភព​អង់គ្លេស​បាន​បញ្ចេញ​វីដេអូ​ បង្ហាញ​ពី​កងកម្លាំង​អង់គ្លេស​ និង​អាមេរិក​កំពុង​ធ្វើ​ការ​រួមគ្នា ​ដើម្បី​រក្សា​សន្តិសុខ​នៅ​អាកាសយានដ្ឋាន​កា​ប៊ុល និង​ជួយ​ឱ្យ​ការ​ជម្លៀស​ចេញ​បន្ត​ដោយ​សុវត្ថិភាព​។ ​កងទ័ព​ត្រូវ​បាន​គេ​មើល​ឃើញ​កំពុង​ដើរ​ល្បាត ​នៅ​ជុំវិញ​បរិវេណ​អាកាសយានដ្ឋាន​កាលពី​ថ្ងៃអាទិត្យ ខណៈ​ហ្វូងមនុស្ស​អា​ហ្វ​ហ្គា​នី​ស្ថាន​បាន​រង់ចាំ​កកកុញ​ នៅ​ខាង​ក្រៅរបង​ព្រលានយន្តហោះ​។​

​កងកម្លាំងប្រដាប់អាវុធ​ចក្រភព​អង់គ្លេស​ បាន​ជួយ​ក្នុង​ការ​ជម្លៀស​ប្រជាជន​អាហ្វហ្គានីស្ថាន ​ដែល​មាន​សិទ្ធិ​ផ្លាស់ប្ដូរ​ទីលំនៅ​ទៅ​ចក្រភព​អង់គ្លេស​ ក្រោម​គោលនយោបាយ​ការ​ផ្លាស់ប្តូរ​ទីលំនៅ ​និង​ជំនួយ​អា​ហ្វ​ហ្គា​នី​ស្ថាន នេះ​បើ​យោង​តាម​ក្រសួងការពារជាតិ​ចក្រភព​អង់គ្លេស​។ ​ក្រសួង​ខាងលើ​ក៏បាន​បញ្ចេញ​រូបភាព​ជនភៀសខ្លួន​អា​ហ្វ​ហ្គា​នី​ស្ថាន ​ដែល​ហត់នឿយ​នៅ​ពេញ​ណែន​ខាងក្នុង​យន្តហោះ C-17 របស់​កងទ័ពអាកាស Royal Air Force C-17 ផង​ដែរ​។ ទូរ​ទស្សន៍ Sky News បាន​រាយការណ៍​កាលពី​ថ្ងៃអាទិត្យ​ថា ​ពួក​តា​លី​បង់​កំពុង​សហការ​ជាមួយ​កងកម្លាំង​ទាហាន​ឆ័​ត្រ​យោង​អង់គ្លេស​ ខណៈ​ដែល​ពួកគេ​ត្រួតពិនិត្យ​មើល​អ្នក​ជម្លៀស​ ដែល​មាន​សិទ្ធិ​នៅ​អាកាសយានដ្ឋាន​កា​ប៊ុល​។​

​វីដេអូ​បង្ហាញ​ពី​យុទ្ធ​ជនតា​លី​បង់​ឈរ​នៅ​ពីលើ​ទូ​កុងតឺន័រ ​ដែល​កម្លាំង​អង់គ្លេស​ប្រើ​ជា​របាំង​នៅ​តំបន់​ត្រួតពិនិត្យ​បណ្ដោះអាសន្ន​ នៅ​ខាងក្រៅ​ព្រលានយន្តហោះ​។​ ​ទោះបី​ពួក​តា​លី​បង់​បាន​សន្យា​ថា​ នឹង​លើកលែងទោស​ដល់​អ្នក​ដែល​បាន​ធ្វើ​ការ​ឲ្យ​អាមេរិក​ ឬ​សម្ព័ន្ធ​ណា​តូយ៉ាងណាក៏ដោយ ប៉ុន្តែ​នៅ​តែ​មាន​របាយការណ៍​នៅ​ពេល​ប៉ុន្មាន​ថ្ងៃ​ថ្មីៗ​នេះ​ថា ពួក​តា​លី​បង់​កំពុង​តាម​ប្រមាញ់​រក​អតីត​សត្រូវ​របស់​ពួកគេ​។ ថ្លែង​ទៅកាន់​ទូរទស្សន៍ Sky News បុរស​ម្នាក់​បាន​និយាយ​ថា ​ពួក​សកម្ម​ប្រយុទ្ធ​កំពុង​វាយដំ​មនុស្ស​ដោយ​កាំភ្លើង និង​របស់​ស្អី​ក៏​មាន​៕

អត្ថបទ៖ សុខមាន