​បាល់ទាត់៖ ​ក្រុមបាល់ទាត់ Nice ត្រូវ​បាន​សំរេច​ឱ្យ​ឈ្នះ Olympique Marseille ៣-០ បន្ទាប់ពី​ការប្រកួត​ដ៏​ច្របូកច្របល់​មានការ​រំខាន​ពី​អ្នកគាំទ្រ​។​ ​Nice បាន​នាំ​មុខមុន ១-០ ដោយ​គ្រាប់​បាល់​របស់ Kasper Dolberg តែ​ក្រោយមក​ការប្រកួត​ក៏ត្រូវ​បាន​ផ្អាក​ដោយសារ​អ្នកគាំទ្រ Nice រត់​ចូលមកក្នុង​ទីលាន​។

​​ក្រុម​អ្នកគាំទ្រ​នៅ​ខាងក្រោយ​សំណាញ់​ទី​បាន​ចោល​ដប​ទឹក និង​វត្ថុ​រឹង​ផ្សេងៗ​មកលើ​កីឡាករ​របស់ Marseille, Dimitry Payet ហើយ Payet ខឹង​ក៏​រើស​ដប​នោះ​គប់​ទៅ​អ្នកគាំទ្រ​វិញ ដែល​ធ្វើឱ្យ​កំហឹង​របស់​អ្នកគាំទ្រ Nice កាន់តែខ្លាំង និង​រត់​ចូល​ទីលានរហូតដល់​ការប្រកួត​ត្រូវបាន​សំរេច​ផ្អាក​តែម្តង​។​ ​​បន្ទាប់ពី​ផ្អាក​រយៈពេល​យូរ កីឡាករ​របស់ Nice ក៏បាន​នាំគ្នា​ដើរចូល​ទីលាន​ដើម្បី​ប្រកួត​បន្ត​តែ​ភាគី​ខាង Marseille មិន​ព្រម​ចូល​ដោយ​ព្រួយបារម្ភ​ពី​សុវត្ថិភាព រួច​មក​ក៏​គណៈកម្មាការ​សំរេច​ផ្តល់​ជ័យជំនះ​ឱ្យ Nice ក្នុងការ​ប្រកួត​នេះ ៣-០​។

​​កីឡាករ​របស់ Marseille មួយចំនួន​ត្រូវបាន​គេ​ដឹងថា​ បានទទួល​រងរបួស​ផងដែរ​ដូចជា Alvaro Gonzalez និង Matteo Guendouzi ដែល​អ្នក​ទាំងពីរ​គឺជា​អ្នករត់​ទៅ​ប្រឈមមុខ​នឹង​អ្នកគាំទ្រ Nice ខណៈ​ខ្សែការពារ Nice, Dante ជា​អ្នក​ព្យាយាម​ឃាត់​។ ​​មិនមែនជា​លើកដំបូង​ទេ​ក្នុង​រដូវ​កាល​នេះ កាលពី ២សប្តាហ៍​មុន​ជំនួប​ដែល Marseille យកឈ្នះ Montpellier ៣-២ ក៏មាន​ការរំខាន​ពី​អ្នកគាំទ្រ​រត់​ចូល​ទីលាន និង​ចោល​ដប​ទឹក​លើ​កីឡាករ​បែបនេះ​ដូចគ្នា​៕

​អត្ថបទ​៖​នាង សុភា​វុ​ធ