អាហារដ្ឋាន មេកដូណាល់ស៍ (McDonald's) បានកាត់បន្ថយពេលវេលានៃសេវាកម្មអាហារពេលព្រឹកមកត្រឹម មួយម៉ោងកន្លះ បន្ទាប់ពីកង្វះស៊ុតដែលបណ្តាលមកពីការផ្ទុះឡើងនៃជំងឺផ្តាសាយបក្សី ដែលបាននាំឱ្យមានការសម្លាប់មាន់ប្រហែល ១,៥ លានក្បាលនៅប្រទេសអូស្រា្តលី។

McDonald's បាននិយាយនៅលើបណ្ដាញសង្គមហ្វេសប៊ុក (Facebook) ថា «ដូចទៅនឹងអ្នកលក់រាយជាច្រើនដែរ ពួកយើងកំពុងគ្រប់គ្រងការផ្គត់ផ្គង់ស៊ុតដោយប្រុងប្រយ័ត្ន ដោយសារបញ្ហាប្រឈមក្នុងឧស្សាហកម្មបច្ចុប្បន្ន» ដោយបន្ថែមថាចាប់ពីថ្ងៃអង្គារ (០៣ កក្កដា) នេះខ្លួននឹងឈប់បម្រើអាហារពេលព្រឹកនៅត្រឹមម៉ោង ១០:៣០ ព្រឹក ជំនួសឱ្យម៉ោងធម្មតាដែលលក់រហូតដល់ពេលថ្ងៃត្រង់។

ប្រទេសអូស្ត្រាលី កំពុងប្រយុទ្ធប្រឆាំងនឹងការផ្ទុះឡើងនៃជំងឺផ្តាសាយបក្សីជាច្រើនប្រភេទ ដែលបានវាយប្រហារលើកន្លែងចិញ្ចឹមបសុបក្សីចំនួន ១១ កន្លែង ដែលភាគច្រើនជាកសិដ្ឋានស៊ុតនៅភាគអាគ្នេយ៍របស់ប្រទេសចាប់តាំងពីខែឧសភា។ ពុំមានមេរោគណាមួយជាប្រភេទជំងឺផ្តាសាយបក្សី H5N1 ដែលបានឆ្លងក្នុងចំណោមបក្សី និងថនិកសត្វទូទាំងពិភពលោក ហើយចម្លងដល់សត្វរាប់ពាន់លានក្បាល និងមនុស្សមួយចំនួនតូចនោះទេ។

តិចជាង ១០ ភាគរយនៃមេមាន់ពងរបស់អូស្ត្រាលីត្រូវបានរងផលប៉ះពាល់ ហើយអាជ្ញាធរនិយាយថាពួកគេកំពុងគ្រប់គ្រងមេរោគដោយជោគជ័យ ប៉ុន្តែអ្នកលក់រាយជាច្រើនបានដាក់ដែនកំណត់លើចំនួនស៊ុតដែលអតិថិជនអាចទិញបាន ដោយបង្កជាបញ្ហាកង្វះស៊ុតស្ទើរទូទាំងប្រទេស៕