ភ្នំពេញ ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅរសៀលថ្ងៃទី៣ កក្កដា ឆ្នាំ២០២៤នេះ

បានចូលរួមកិច្ចប្រជុំពិនិត្យ និងពិភាក្សាលើការពិនិត្យលើខ្លឹមសារនៃក្របខ័ណ្ឌកម្មវិធី FAO New Country Programming Framework (CPF) 2024-2028 ដែលផ្តោតសំខាន់ក្នុងវិស័យជលផល និងព្រៃឈើ៕

​នៅក្រោយបញ្ចប់កិច្ចប្រជុំ ក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា កិច្ចប្រជុំនេះ មានគោលបំណងជួយខ្សែច្រវាក់ផលិតកម្មកសិកម្ម ការគ្រប់គ្រងប្រព័ន្ធចំណីអាហារ សុខភាពសត្វនិងផលិតកម្មសត្វ អនុវិស័យជលផល និងអនុវិស័យព្រៃឈើ។

 ក្នុងកិច្ចប្រជុំនេះដែរ ឯកឧត្តមរដ្ឋមន្ត្រី បានណែនាំដល់ក្រុមការងារបច្ចេកទេសត្រូវសិក្សាឱ្យបានគ្រប់ជ្រុងជ្រោយ និងពិនិត្យឱ្យបានល្អិតល្អន់ ត្រឹមត្រូវ ព្រមទាំងមានខ្លឹមសារច្បាស់លាស់គ្រប់គ្រាន់។ 

បើតាម ឯកឧត្តមរដ្ឋមន្ត្រី ត្រូវជំរុញការងារសហគមន៍កសិកម្មទំនើបឱ្យមានប្រសិទ្ធភាព ជាពិសេសលើកទឹកចិត្តដល់សហគមន៍ទំនើបកសិរុក្ខកម្ម ដែលអាចឱ្យកសិករធ្វើផលិតកម្មកសិកម្ម និងអាចថែរក្សាព្រៃឈើបានពិតប្រាកដ៕

អត្ថបទ ឈិត បូរ៉ាវី