អំឡុងកិច្ចប្រជុំជាមួយសមភាគីអ៊ុយក្រែន នៅឯមន្ទីរបញ្ចកោណ កាលពីថ្ងៃអង្គារ (ទី២ ខែកក្កដា) រដ្ឋមន្ត្រីការពារជាតិអាមេរិក លោក Lloyd Austin បាននិយាយថា សហរដ្ឋអាមេរិកនឹងប្រកាសក្នុងពេលឆាប់ៗនេះ នូវជំនួយសន្តិសុខថ្មីចំនួនជាង ២,៣ពាន់លានដុល្លារ សម្រាប់អ៊ុយក្រែន។

ជាមួយគ្នានេះ លោក Austin ក៏បានសម្ដែងការយល់ស្របរបស់លោក ចំពោះគោលបំណងរបស់អ៊ុយក្រែន ក្នុងការចូលជាសមាជិករបស់អង្គការណាតូ (NATO) នៅទីបំផុត។ នៅឯកិច្ចប្រជុំកំពូលរបស់អង្គការណាតូ នាសប្តាហ៍ក្រោយ ក្នុងទីក្រុងវ៉ាស៊ីនតោនឌីស៊ី លោក Austin បាននិយាយថា៖ «យើងនឹងចាត់វិធានការ ដើម្បីតភ្ជាប់ទំនាក់ទំនងទៅកាន់សមាជិកភាពរបស់អង្គការណាតូ សម្រាប់អ៊ុយក្រែន»។ តែលោក Austin មិនបានបញ្ជាក់លម្អិតបន្ថែមនោះទេ។

មន្ត្រីអ៊ុយក្រែនបាន និងកំពុងជំរុញសម្ព័ន្ធមិត្ត អស់រយៈពេលជាច្រើនខែមកហើយ ឲ្យផ្គត់ផ្គង់ប្រព័ន្ធការពារដែនអាកាសបន្ថែមទៀត ដើម្បីការពារប្រឆាំងនឹងការវាយប្រហារជាញឹកញាប់ដោយមីស៊ីល និងយានដ្រូន ពីកងកម្លាំងរុស្ស៊ី បន្ទាប់ពីមានការលុកលុយរបស់ទីក្រុងមូស្គូ ក្នុងឆ្នាំ២០២២។

លោក Austin បាននិយាយថា កញ្ចប់ជំនួយអាវុធចុងក្រោយ សម្រាប់អ៊ុយក្រែននេះ នឹងរួមបញ្ចូលសព្វាវុធជាច្រើន ដូចជាអាវុធប្រឆាំងរថក្រោះ និងឧបករណ៍ស្ទាក់ចាប់ប្រព័ន្ធការពារដែនអាកាស ហើយនឹងអនុញ្ញាតឲ្យមានការពន្លឿនការទិញប្រព័ន្ធស្ទាក់ចាប់ការពារដែនអាកាស NASAMS និង Patriot៕