ប្រព័ន្ធផ្សព្វផ្សាយរដ្ឋចិន នៅថ្ងៃពុធ (ទី៣ ខែកក្កដា) នេះ បានរាយការណ៍ថា ប្រធានាធិបតីចិន លោក Xi Jinping (ស៊ី ជីនពីង) បាននិយាយថា លោកគាំទ្រឲ្យកាហ្សាក់ស្ថានចូលរួមក្នុងប្លុក BRICS ខណៈដែលក្រុមប្រទេសកំពុងអភិវឌ្ឍន៍ក្នុងប្លុកនេះ កំពុងពិចារណាពង្រីកសមាជិកបន្ថែមទៀត ដើម្បីតទល់នឹងសណ្ដាប់ធ្នាប់ពិភពលោកគ្រប់គ្រងដោយលោកខាងលិច ដែលក្រុមនេះយល់ថា ហួសសម័យកាលហើយ។

ថ្លែងទៅកាន់អ្នកសារព័ត៌មានជាមួយប្រធានាធិបតីកាហ្សាក់ស្ថាន លោក Kassym-Jomart Tokaev បន្ទាប់ពីមានជំនួប នៅរដ្ឋធានីរបស់ប្រទេសអាស៊ីកណ្តាល លោក ស៊ី បានលើកទឹកចិត្តកាហ្សាក់ស្ថានឲ្យ «ដើរតួនាទីជាមហាអំណាច នៅភាគកណ្តាលលើឆាកអន្តរជាតិ និងធ្វើការរួមចំណែកជាកាតព្វកិច្ចដល់អភិបាលកិច្ចពិភពលោក» ខណៈពេលដែលលោកគាំទ្រទីក្រុង Astana ចូលជាសមាជិករបស់ BRICS។

គួរបញ្ជាក់ថា ប្រទេសចិន និងរុស្ស៊ីកំពុងជំរុញឲ្យមានការពង្រីកសមាជិករបស់ក្រុម BRICS ដែលរួមមានប្រេស៊ីល ឥណ្ឌា និងអាហ្វ្រិកខាងត្បូងផងដែរ ខណៈដែលពួកគេស្វែងរកការទប់ទល់នឹងឥទ្ធិពលសេដ្ឋកិច្ចរបស់លោកខាងលិច។

ដោយមានអក្សរកាត់ដើមដែលបង្កើតឡើងដោយប្រធានសេដ្ឋវិទូរបស់ក្រុមហ៊ុន Goldman Sachs គឺលោក Jim O'Neill ក្នុងឆ្នាំ២០០១ ប្លុកនេះត្រូវបានបង្កើតឡើងជាក្រុមក្រៅផ្លូវការមានប្រទេសចំនួន៤ ក្នុងឆ្នាំ២០០៩ ហើយបានបន្ថែមអាហ្រ្វិកខាងត្បូង ១ឆ្នាំក្រោយមក។ កាលពីខែសីហា ប្លុក BRICS បានយល់ព្រមទទួលយកអារ៉ាប៊ីសាអ៊ូឌីត អ៊ីរ៉ង់ អេត្យូពី អេហ្ស៊ីប និងអារ៉ាប់រួម។ តែយ៉ាងណាក្ដី អារ៉ាប៊ីសាអ៊ូឌីត មិនទាន់បានចូលរួមក្នុងក្រុមនេះនៅឡើយទេ៕