ខណៈពេលដែលសង្រ្គាមកំពុងតែបន្តនៅតំបន់ហ្កាហ្សា និងគំរាមកំហែងរីករាលដាលដល់ប្រទេសលីបង់ បណ្ដាក្រុមសកម្មប្រយុទ្ធអ៊ីរ៉ាក់ បានព្រមានថាពួកគេត្រៀមខ្លួនរួចជាស្រេចដើម្បីចូលទៅក្នុងជម្លោះប្រឆាំងនឹងអ៊ីស្រាអែល និងសហរដ្ឋអាមេរិក។ មេបញ្ជាការតំបន់នៃចលនាតស៊ូអ៊ីស្លាមនិយមនៅក្នុងប្រទេសអ៊ីរ៉ាក់បាននិយាយថា នឹងមានការប្រើប្រាស់ «កម្លាំងទល់កម្លាំង» នៅក្នុងព្រឹត្តិការណ៍នៃសង្រ្គាមពេញលេញនៅលីបង់។

មេបញ្ជាការនោះបាននិយាយទៅកាន់សារព័ត៌មាន AFP ក្នុងលក្ខខណ្ឌមិនបញ្ចេញឈ្មោះថា ក្រុមដែលគាំទ្រដោយអ៊ីរ៉ង់ បានបញ្ជូន «អ្នកជំនាញ និងទីប្រឹក្សា» ទៅកាន់លីបង់ រួចរាល់ហើយ។

អ្នកវិទ្យាសាស្ត្រនយោបាយអ៊ីរ៉ាក់ លោក អាលី អាល់-បៃដា (Ali al-Baidar) បានយល់ស្របថា ប្រសិនបើមានសង្គ្រាមដ៏ធំមួយរវាងអ៊ីស្រាអែល និងក្រុមហេសបូឡា (Hezbollah) របស់លីបង់ «នោះវានឹងមិនស្ថិតនៅតែចំពោះទឹកដីលីបង់ទេ»។

លោកនិយាយថា ក្រុមប្រដាប់អាវុធនៅអ៊ីរ៉ាក់ និងនៅក្នុងតំបន់ នឹងចូលរួមក្នុងការប្រឈមមុខដាក់គ្នានោះ ដោយបន្ថែមថាពួកគេនឹងចង់បង្ហាញ «សមត្ថភាពរបស់ខ្លួន ប៉ុន្តែក៏ចង់បង្ហាញពីភាពស្មោះត្រង់ចំពោះសម្ព័ន្ធមិត្តរបស់ពួកគេផងដែរ»។

សង្គ្រាមនៅតំបន់ហ្កាហ្សា ដ៏បង្ហូរឈាមបំផុតមិនធ្លាប់មានបានផ្ទុះឡើង នៅពេលដែលក្រុមសកម្មប្រយុទ្ធប៉ាឡេស្ទីនហាម៉ាស វាយប្រហារភាគខាងត្បូងអ៊ីស្រាអែលកាលពីថ្ងៃទី០៧ ខែតុលា។ ជម្លោះនេះបានពង្រីកយ៉ាងឆាប់រហ័សដោយមានការពាក់ព័ន្ធនឹងក្រុមប្រដាប់អាវុធគាំទ្រដោយអ៊ីរ៉ង់ជាច្រើន ហៅថា «ចលនាអ័ក្សនៃការតស៊ូ» ដែលបង្ហាញពីសាមគ្គីភាពជាមួយប៉ាឡេស្ទីន និងទាមទារឱ្យមាន បញ្ចប់ការវាយលុករបស់អ៊ីស្រាអែល នៅហ្កាហ្សា៕