​នៅព្រឹកថ្ងៃទី៤ ខែកក្កដានេះ ឧបនាយករដ្ឋមន្ត្រី សុខ ចិន្តាសោភា រដ្ឋមន្ត្រីក្រសួងបរទេស និង​កិច្ច​សហប្រតិបត្តិការអន្តរជាតិ បានអញ្ជើញជូនដំណើរកងអនុសេនាធំវិស្វកម្មលេខ ៤៦៨ ចំនួន​ ២៤៤​​នាក់ ប្តូរវេនទៅបំពេញបេសកកម្មថែរក្សាសន្តិភាពអង្គការសហប្រជាជាតិ UNនៅ​សាធារណ​រដ្ឋ​អាហ្វ្រឹក​កណ្តាល ក្នុងឱកាសនេះដែរ មន្ត្រីការបរទេស បានថ្លែងថា កម្ពុជា ក៏បាន​រៀប​ចំ​កង​កម្លាំង​ជា​ច្រើន​កងទៀតត្រៀមបញ្ជូនបន្ថែមតាមសំណើរUN។

ឯកឧត្តម ឧបនាយករដ្ឋមន្ត្រី សុខ ចិន្តាសោភា ក្នុងនាម ប្រធាន​គណៈកម្មាធិការ​ជាតិ​សម្រប​សម្រួល​ការ​បញ្ជូនកងកម្លាំងរក្សាសន្តិភាព បានថ្លែងថា តាមរយៈការតាំង​ចិត្ត​ខ្ពស់រ​បស់​រាជ​រដ្ឋាភិបាល​កម្ពុជា ការបន្តបញ្ជូនកងកម្លាំងថែរក្សាសន្តិភាពUNនេះ នៅពេលនេះ កម្ពុជា​ផ្ទាល់​ក៏​បាន​ត្រៀម​ខ្លួនរួចរាល់អស់ហើយ និងអាចចាត់បញ្ជូនទាន់ពេលវេលា នៅពេលអង្គការ​សហ​ប្រជាជាតិ មានតម្រូវចាត់បញ្ជូនរហ័ស ចូលរួមប្រតិបត្តិការថែរក្សាន្តិភាពUN នៅថ្ងៃខាងមុខ។

ឯកឧត្តម ឧបនាយករដ្ឋមន្ត្រី បានថ្លែងថា អនុវត្តតាមសំណូមពរអង្គការសហប្រជាជាតិ បច្ចុប្បន្ន កម្ពុជា បានដាក់បញ្ចូលកងកម្លាំងរក្សាសន្តិភាពចូលទៅក្នុងប្រព័ន្ធត្រៀមជាស្រាច់ UNPCRS រួមមាន​៖ កងវិស្វកម្មព្រលានយន្តហោះមួយកងអនុសេនាធំចំនួន១២៩នាក់ កងស្ពានបណ្តែតទឹក និង​ចល័តលើគោក ១កង ចំនួន១៩៤នាក់ និងកងអាវុធហត្ថ១កង ចំនួន១១៩នាក់ រួចហើយ ហើយ​កង​ទាំងនេះអស់ត្រូវបានត្រួតពិនិត្យសុខភាព និងបានហ្វឹកហ្វឺនជំនាញរួចរាល់ មុនអនុញ្ញាត​ចេញ​ដំណើរ។

នាយឧត្តមសេនីយ សែម សុវណ្ណនី អគ្គនាយកមជ្ឈមណ្ឌលជាតិ គ្រប់គ្រងកម្លាំងរក្សាសន្តិភាព ថ្លែង​ថា ក្នុងរយៈពេល១៨ឆ្នាំមកនេះ កម្ពុជា បានបញ្ជូនកងកម្លាំងសរុបប្រមាណ៩៥៧០នាក់ ទៅ​បំពេញបេសកកម្មថែរក្សាសន្តិភាពអង្គការសហប្រជាជាតិ ចំនួន១២បេសកកម្ម នៅ​តាម​បណ្តា​ចំនួន ១០ប្រទេស រួមមាន សាធារណរដ្ឋស៊ូដង់ ស៊ូដង់ខាងត្បូង ឆាដ លីបង់ សាយប្រើស ស៊ីរី អាហ្វ្រិក​កណ្តាល ម៉ាលី យ៉េមែន និងសាធារណរដ្ឋប្រជាធិបតេយ្យកុងហ្គោ ធ្វើការងារ​លើ​ជំនាញ​បោស​សំអាត​មីន វិស្វកម្មសំណង់ផ្តេក-បញ្ឈរ អាវុធហត្ថ មន្ទីរពេទ្យកម្រិត២ វិស្វកម្ម​ព្រលាន​យន្ត​ហោះ កំទេចគ្រាប់មិនទាន់ផ្ទុះ នាយទាហានសេនាធិការ និងសង្កេតការណ៍យោធា។

ឯកឧត្តម នាយឧត្តមសេនីយ សែម សុវណ្ណនី បន្តថា បច្ចុប្បន្ន កម្ពុជា មានកងកម្លាំងមួកខៀវ ប្រមាណ​ ៦២៧នាក់ បាននិងកំពុង​បំពេញ​បេសកកម្ម​តាម​បណ្តា​ប្រទេ​ស​កំពុង​មាន​ជម្លោះ​សង្គ្រាម​ចំនួ​ន៤ រួមមាន៖ ស៊ូដង់ខាងត្បូង លីបង់ អាហ្វិ្រកកណ្តាល និងសាធារណរដ្ឋ​ប្រជាធិបតេយ្យ​កុងហ្គោ៕ អត្ថបទ ស៊ុម សុខជា